ایران رهبری مجتبی خامنه‌ای امریکاده آره‌لیق سیلاولرده جمهوریت‌چیلر حزبی مغلوبیتگه اوچره‌گنیدن سۉنگ نشر قیلگن مراجعتیده، امریکانینگ ایرانگه نسبتاً دشمنانه مناسبتی اوشبو مملکتده‌گی حزبی و سیاسي اۉزگریشلر، شونینگدېک، یان بېریشلر بیلن اۉزگرمسلیگینی ایتدی.
ایران رهبری بوگون (چهارشنبه، ۱۳ عقرب) «جهان امپریالیزمیگه قرشی کوره‌ش ملي کونی» مناسبتی بیلن اعلان قیلگن مراجعتیده شونده‌ی دېدی: «اگر هنوز امریکا حکمرانلیک تیزیمی نینگ خطی-حرکتی یاکه اونده‌گی حزبی و سیاسي اۉزگریشلر طفیلی مناسبتلر اۉزگریشیگه آز‌گینه بۉلسه-ده امید قیله‌یاتگنلر یاکه امریکاگه یان بېریش آرقه‌لی اونی ایران خلقیگه نسبتاً دشمنلیکدن قَیتریش ممکن دېب اۉیله‌یاتگنلر بۉلسه، اولر قتّيق اده‌شماقده».
مجتبی خامنه‌ای اوشبو مراجعتیده، شونینگدېک، امریکانینگ ایرانگه قرشی هجوملری تکرارلنگن تقدیرده، ایران نینگ جوابی «جوده کېنگراق کۉلم کسب اېتیشی» حقیده آگاهلنتیردی.
ایران رهبری‌نینگ مراجعتیده شونده‌ی دېییله‌دی: «ایران‌نینگ هرمز بۉغازی اوستیدن نظارت اۉرنه‌تیشی و امریکا نینگ منطقه مملکتلریده‌گی حربي بازه‌لرینی یۉق قیلیشی، گرچه امریکانینگ اوچینچی مجبوري اوروشده‌گی تجاوزی و جنایتلریگه جواب بۉلگن بۉلسه-ده، عینِ پیتده منطقوي مقیاسده امپریالیزمگه قرشی دستلبکی جهاد هم حسابلنه‌دی. اگر تجاوزلر تکرارلنسه، بو حرکت ینه‌ده کېنگراق کۉلم کسب اېته‌دی».
اېران اۉتگن ییل نینگ ۹حوت سنه‌سیده امریکا و اسرایل‌نینگ اوشبو مملکتگه قرشی هجوملری باشلنگنیدن سۉنگ هرمز بۉغازینی یاپگن و منطقه مملکتلریده‌گی امریکا حربي بازه‌لریگه قرشی جواب ضربه‌لرینی باشله‌گن اېدی.
سۉنگگی کونلرده امریکا آره‌لیق سیلاولردن کېین ایرانگه ینه هجوم قیلیشگه تیارگرلیک کۉره‌یاتگنی حقیده خبرلر ترقه‌لدی.
ایران رسميلری اوشبو خبرلرگه مناسبت بیلدیرر اېکن، هر قنده‌ی ینگی هجومگه جواب اوّلگیدن هم کېنگراق کۉلمده بۉلیشینی ایتگن.
ایران رهبری مملکت حربي قوماندانلریگه امریکا تامانیدن ینگی هجوم صادر اېتیلگن تقدیرده، زودلیک بیلن و جغرافیوی چېکلاولرسیز جواب قَیتریش حقیده بویروق بېرگن.
