آق اوی قطر باش وزیری و تشقی ایشلر وزیری، شونینگدېک، ایران و امریکا اۉرتهسیدهگی مذاکرهلرده واسطهچیلردن بیری بۉلگن شیخ محمد بن عبدالرحمان آل ثانی بوگون (دوشنبه، ۱۸ عقرب) امریکا جمهور رییسی دونالد ترامپ بیلن اوچرهشیب، مذاکره اۉتکزیشینی معلوم قیلدی.
آق اوی معلوماتیگه کۉره، ترامپ قطر باش وزیری و تشقی ایشلر وزیری بیلن یاپیق اېشیکلر آرتیده اوچرهشهدی. شیخ محمد بن عبدالرحمان آل ثانی شونینگدېک، امریکا جمهور رئیس اۉرینباسریی جیدی ونس بیلن هم اوچرهشیب، مذاکره اۉتکزیشی رېجهلشتیریلگن.
قطر واشینگتن و تهران اۉرتهسیدهگی واسطهچی صفتیده مهم رۉل اۉینهب کېلماقده. اوشبو مملکت تامانلر اۉرتهسیده تکلیفلرنی یېتکزیش بیلن بیرگه، ایراننینگ هسته دستوری و اوروشنی یکونلش شرطلری بارهسیدهگی کېلیشماوچیلیکلرنی برطرف اېتیشگه حرکت قیلماقده.
قطر باش وزیری و دونالد ترامپ اۉرتهسیدهگی اوچرهشوو ایران و امریکا اۉرتهسیدهگی اوروشنی توگهتیشگه قرهتیلگن دیپلوماتیک سعی-حرکتلر جدّي تۉسیقلرگه دوچ کېلهیاتگن، سۉنگگی کونلرده اېسه امریکا ایران جَنوبیدهگی نشانلرگه ینه هجوم قیلگن بیر پیتده بۉلیب اۉتماقده.
رویترز آژانسینینگ خبر بېریشیچه، امریکا دولت تشقی ایشلر وزیری مایک روبی کېچه ایران بیلن ملاقات و مذاکرهلرده آزگینه سیلجیش بۉلگنینی، بیراق یقین آرهده بیرار یوتوققه اېریشیلیشیگه امید قیلمهیاتگنینی ایتگن.
امریکا دولت کاتبی، شونینگدېک، ترامپ دیپلوماتیک یېچیم طرفداری اېکنینی، بیراق ایران نینگ طلبلری «قبول قیلیب بۉلمهیدیگن»، اَیریم حاللرده اېسه «جوده غلطی، کولگیلی و مطلقا حقیقتدن ییراق» اېکنینی تأکیدلهگن.
ایران تشقی ایشلر وزیرلیگی مطبوعات سوزلاوچیسی اسماعیل بقایی بوگون امریکا دولت تشقی ایشلر وزیری نینگ بیاناتیگه مناسبت بیلدیریب، ایران نینگ اوروشنی توگهتیش بۉییچه تکلیفینی «یخشی نیت نینگ اېنگ یوقاری نمونهسی» و ممکن بۉلگن «اېنگ منطقلی رېجه» دېب اتهگن.
دونالد ترامپ سۉنگگی پیتلرده امریکا ایران حدودیگه قرشی حربي هجوملرنی قَیته باشلشی ممکنلیگی حقیده بیر نېچه بار تهدید قیلگن.
شونگه قرهمهی، او سۉنگگی بیاناتیده مذاکرهلرده سیلجیش کوزهتیلسه، ایرانگه قرشی ینگی هجوملر باشلش حقیده بویروق بېریشی احتمالدن ییراق اېکنینی ایتگن.
