افغانستاننینگ قندهار شهریده یوزلب فارمسیون کمپنیلری خادملری و مسووللری پاکستان دارو-درمانلرینی ساتیش چېکلنگنیگه قرشی ناراضیلیک نمایشی اۉتکزدی. بیراق طالبلر نمایشچیلرنینگ ناراضیلیک اعتراضینی دوام اېتتیریشیگه تۉسقینلیک قیلدی.
قندهاردهگی بیر منبعنینگ آتی فاش قیلینمسلیک شرطی بیلن ایتیشیچه، نمایش بوگون (چهارشنبه، ۲۰ عقرب) اېرتهلب قندهار شهریدهگی «سرک جدید» حدودیده باشلنگن.
منبعنینگ سۉزلریگه کۉره، نمایشچیلر پاکستان دارو-درمانلرینی ساتیش تعقیقلنگنیگه قرشی ناراضیلیک بیلدیرگن و «پاکستان دارولرینینگ اۉرنینی باسهدیگن مقابل دارولرنی ایستهیمیز» مضمونیدهگی شعارلرنی ایتیشگن.
منبعنینگ قۉشیمچه قیلیشیچه، شوندن سۉنگ طالبلر حربیلری واقعه جاییگه یېتیب کېلیب، نمایشنینگ دوام اېتیشیگه تۉسقینلیک قیلگن.
منبع معلوماتلریگه کۉره، ییریک فارمسیون کمپنیلری دوکانلری و بازارلری جایلشگن «سرک جدید» حدودی حاضرده طالبلر تامانیدن قورشهب آلینگن و تینچ اهالینینگ اوشبو حدودگه کیریشیگه رخصت بېریلمهیپتی.
طالبلر یقینده پاکستان دارو-درمانلرینی ساتیشنی تعقیقلهگن اېدی.
طالبلر اۉتگن ییلی پاکستان بیلن یوزهگه کېلگن کېسکینلیکدن سۉنگ، بو مملکتدن دارو-درمان ایمپورت قیلیشنی تعقیقلهگن اېدی. اوشبو تعقیق دارو-درمانلر نرخینینگ آشیشیگه سبب بۉلدی.
شو بیلن بیرگه، پاکستان دارو-درمانلری حاضرده افغانستانگه ناقانوني یۉللر آرقهلی آلیب کیریلهیاتگنی ایتیلماقده. نظارتسیز عملگه آشیریلهیاتگن بو جریان فقرالر حیاتینی خوف آستیگه قۉیماقده.
