دونالد ترامپنینگ مخصوص وکیللری، استیو ویتکاف و جرد کوشنر روسيه، اوکراین و امریکا اۉرتهسیده ابوظبیده ایکّی کون دوام اېتگن اوچ تامانلهمه مذاکرهلردن سۉنگ ولادیمیر پوتین و والادیمیر زلنسکي بیلن اوچرهشدی.
جرید کوشنر بوگون (جمعه، ۲۲عقرب) ایکس اجتماعي ترماغیده بیانات بېریب، اوشبو تشریفلردن مقصد تینچلیک جریانینی قَیته تیکلش و کېلگوسی مذاکرهلرده اروپا نینگ اشتراکی اوچون زمین یرهتیش اېکنینی بیلدیردی.
ایکّی مخصوص وکیل پنجشنبه، ۲۱ عقرب کونی روسيه جمهور رییسی ولادیمیر پوتین بیلن کرېملین سراییده قریب ایکّی ساعت دوام اېتگن اوچرهشوودن سۉنگ ایرلندگه یۉل آلدی. اولر او یېرده اوکراین جمهور رییسی والادیمیر زلنسکي بیلن بیر ساعتدن آرتیق مذاکره اۉتکزدی.
اوشبو اوچرهشوولر ۱۰ و ۱۱-نوامبر کونلری ابوظبیده بۉلیب اۉتگن مذاکرهلردن کېین عملگه آشیریلدی. ابوظبیده مذاکرهلری تۉقّیز آیدن بېری ایلک بار امریکا واسطهچیلیگیده روسيه و اوکراین هیئتلری اۉرتهسیده اۉتکزیلگن بېواسطه ملاقات بۉلدی.
اویتکاف پوتین بیلن اوچرهشوودن سۉنگ روسيه جمهور رییسی مذاکرهلر نینگ نوبتدهگی باسقیچیده اروپا وکیللرینینگ اشتراک اېتیشیگه راضیلیک بیلدیرگنینی ایتدی.
کوشنر هم واشنگتن اروپا نینگ موضوعسیده اۉزگریش کوزهتهیاتگنینی و تینچلیک جریانیده آلدینگه سیلجیش اوچون اوشبو مملکتلرنینگ اشتراکی ضرور اېکنینی تأکیدلهدی.
پوتین ترامپنینگ مخصوص وکیللری بیلن اوچرهشووده روسيه هېچ قچان اروپا بیلن مذاکرهلرگه قرشی بۉلمهگنینی ایتدی. بیراق او تینچلیک کېلیشوویدن سۉنگ اروپا دولتلری حربي کوچلری نینگ اوکراینده جایلشتیریلیشی مسکو تامانیدن «خوفسیزلیککه تهدید» صفتیده بهالنیشی و اوروشنینگ قَیته باشلنیشیگه سبب بۉلیشی ممکنلیگیدن آگاهلنتیردی.
جرېد کوشنر اعلان قیلگن ویدیوده زلنسکي اروپا نینگ تینچلیک مذاکرهلریده بېواسطه اشتراک اېتیشینی قۉللب-قوّتلهگن.
دوبلینگه تشریف بویورگن زلنسکي اروپا دولتلری علیحده مصلحت بېریش بیلن چېکلنیب قالمسدن، مذاکرهلر چوکییده هم اشتراک اېتیشی کېرهکلیگینی ایتدی.
شونینگدېک، زلنسکي کېلگوسی مذاکرهلر کون ترتیبیگه «اۉت آچیشنی توختهتیش» و «کېسکینلیکنی کمهیتیریش» مسألهلرینی کیریتیشنی طلب قیلدی.
جرېد کوشنذ، شونینگدېک، مسکو و کيیف ابوظبیده مذاکرهلریده ییریک حربي اسیرلر المشینووی بۉییچه کېلیشووگه اېریشگنینی تصدیقلهدی.
اوشبو کېلیشوو عملگه آشیریلسه، هر ایکّی تاماندن مینگلب حربي خدمتچیلر عایلهلریگه قَیتیشی ممکن. کوشنېر بو المشینوونی «حربي اسیرلر نینگ اېنگ ییریک المشینووی» دېب تعریفلهدی.
شونگه قرهمهی، باسیب آلینگن حدودلر، اوکرایننینگ ناتوگه اعضا بۉلیشی، مملکت حربي صلاحیتیگه قۉییلهدیگن چېکلاولر همده اوروشدن کېینگی خوفسیزلیک کفالتلری بارهسیدهگی کېلیشماوچیلیکلر هنوز حل اېتیلمهگن.
حاضرچه سنهسی بېلگیلنمهگن نوبتدهگی مذاکرهلر اروپا دولتلری وکیللری اشتراکیده اۉتکزیلیشی رېجهلشتیریلگن. اونده حدودي مسألهلر بیلن بیر قطارده اروپا نینگ خوفسیزلیک ترتیبابلری هم محاکمه قیلینهدی.
