ایراننینگ انقلاب پاسبانلری بحریندهگی امریکا حربي کوچلری جایلشگن بزهگه درون هجومی اویوشتیریلگنی حقیده خبر بېردی.
انقلاب پاسبانلری بیاناتیده ایتیلیشیچه، اوشبو هجوم امریکا اوردوسینینگ اوچووچیسیز اوچیش اپاراتلری تامانیدن ایران هوا حدودی نینگ منتظم روشده بوزیلیشیگه جوابن عملگه آشیریلگن.
انقلاب پاسبانلری بوگون اېرتهلب (سهشنبه، ۲۶ عقرب) اۉزینینگ جنگاور درونلری امریکانینگ «تجاوزکار کوچلری»گه تېگیشلی رادار تیزیمینی شیخ عیسی بازهسیده نشانگه آلگنینی معلوم قیلدی.
فرانس پرس اخبارات آژانسی خبرچیسی هم بحرین پایتختی منامه شهریده پارتلش آوازی اېشیتیلگنینی خبر قیلگن. بو واقعهدن آلدین شهر اهالیسی تېلفون آرقهلی «احتمالي تهدید» موجودلیگی حقیده آگاهلنتیریش آلگن.
بحرین ایچکی ایشلر وزیرلیگی اۉز خبریده مملکت آدملرنی «اېنگ یقین خوفسیز جایگه باریشگه» چقیرگن.
سۉنگگی کونلرده ایران یقین شرقدهگی امریکا حربي بزهلریگه هم هجوم قیلگن اېدی.
بو هجوملر امریکا اوردوسی ایران نینگ اَیریم آراللریگه ضربه بېرگنیدن کېین عملگه آشیریلگن.
واسطهچیلر نینگ سعی-حرکتلری و ایکّی تامان اۉرتهسیده خبرلر المشیلگنیگه قرهمهی، امریکا و ایران اۉرتهسیدهگی کېسکینلیک دوام اېتماقده.
یقینده امریکا جمهور رئیس اۉرینباسریی جیدی ونس ایران خوفسیزلیک کېنگشی کاتبی بیلن اوچرهشوو اۉتکزیش مسألهسینی کۉریب چیقهیاتگنی حقیده خبر بېریلگن اېدی. دونالد ترامپ هم اقش ایران بیلن مذاکرهلر آلیب باریشگه محتاج اېکنینی بیلدیرگن.
