ایران انرژی وزیری عباس علی آبادي طالبلر مالیه وزیری ملا محمد ناصر بیلن اوچرهشووده، اگر افغانستان برق ترماغی برق انرژیسینی تقسیملشگه تیار بۉلسه، ایران زودلیک بیلن افغانستانگه ۲ مینگ مېگاوات برق انرژیسی یېتکزیب بېریشگه تیار اېکنینی ایتدی.
طالبلر مالیه وزیرلیگی بوگون (دوشنبه، ۲۵عقرب) کېچقورون اعلان قیلگن بیاناتیده، ایران انرژی وزیری افغانستانده انرژی ساحهسیگه سرمایه کیریتیش و برق انرژیسی ترانزیتی بۉییچه هم تۉلیق همکارلیک قیلیشگه وعده بېرگنینی معلوم قیلدی.
وزیرلیک نینگ قۉشیمچه قیلیشیچه، علی آبادي برق انرژیسی ساحهسیده پرافشنل و تخنیکي همکارلیکنی یۉلگه قۉییش اوچون قۉشمه کمیته تشکیل اېتیشنی هم تکلیف قیلگن. شونینگدېک، افغانستان طلبهلرینی انرژی یۉنهلیشیده اۉقیتیشگه تیار اېکنینی بیلدیرگن.
طالبلر مالیه وزیری برق انرژیسی ساحهسیدهگی همکارلیک بۉییچه قۉشمه تخنیکي کمیته تشکیل اېتیش تکلیفینی معقولهگن و اوشبو کمیته ایکّی تامانلهمه اقتصادي همکارلیک کمیسیونی نینگ اساسي کمیتهلریدن بیری بۉلیشی کېرهکلیگینی ایتگن.
افغانستان اۉزیگه ضرور بۉلگن الکتر انرژیسی نینگ بیر قِسمینی ایراندن صادر قیلهدی. ایراندن صادر قیلینهدیگن الکتر انرژیسی اساسن مملکت نینگ غربي ولایتلری، جملهدن، هرات، فراه و نیمرۉز اهالیسی اوچون تقسیملنهدی.
