طالبلرنینگ پاکستاندهگی اېلچیسی سردار احمد شکیب بریتانیانینگ افغانستان بۉییچه مخصوص وکیلی ریچارد لیندسی بیلن اوچرهشگنینی معلوم قیلدی.
طالبلر اېلچیسی بوگون (سهشنبه، ۲۶ عقرب) ایکس اجتماعي ترماغیده یازیشیچه، اوچرهشووده افغانستان و بریتانیا اۉرتهسیدهگی مناسبتلر، منطقهدهگی خوفسیزلیک بیلن باغلیق سۉنگگی اۉزگریشلر همده منطقوي برقرارلیکنی مستحکملش و عمومي معمالرنی حل اېتیشده ملاقات و دیپلوماتیک علاقهلرنی دوام اېتتیریش مهملیگی یوزهسیدن «کانتروکتیف صحبت» بۉلیب اۉتگن.
طالبلر اېلچیسی اوشبو صحبت تفصیلاتلری حقیده قۉشیمچه معلومات بېرمهگن.
بریتانیانینگ افغانستان بۉییچه مخصوص وکیلی یقینده کابلگه تشریف بویوریب، طالبلرنینگ تورلی رسميلری بیلن اوچرهشگن و مذاکرهلر صحبتلر اېدی.
شونینگدېک، او سۉنگگی کونلرده طالبلر باش وزیری دفتری باشلیغی مولوی عبدالواسع بیلن تیلفون آرقهلی گپلشگن.
طالبلر باش وزیری دفترینینگ معلوم قیلیشیچه، بریتانیا مخصوص وکیلی اوشبو تیلفون صحبتی دوامیده مملکتینینگ طالبلر و پاکستان اۉرتهسیده واسطهچیلیک قیلیشگه تیارلیگینی بیلدیرگن.
طالبلر و پاکستان اۉرتهسیده بیر ییلدن آرتیق وقتدن بېری کېسکینلیک و قوراللی تۉقنهشوولر دوام اېتماقده. اوشبو کېسکینلیک و تۉقنهشوولر عاقبتیده ایکّی مملکت اۉرتهسیدهگی چېگره اۉتیش پونکتلری یاپیلیب، سودا-ساتیق و قوروقلیک آرقهلی قتناو توختهب قالگن.
