طالبلر مالیه وزیرلیگی اوشبو گروه مالیه وزیری و ایران اقتصاد و مالیه وزیری اۉرتهسیده اېریشیلگن کېلیشووگه موافق، اسلام قلعه باجخانه بندری نینگ فعالیتی کېلهسی هفتهنینگ شنبه کونیدن باشلب ۲۴ساعتلیک ترتیبده یۉلگه قۉییلیشینی معلوم قیلدی.
مذکور وزیرلیک بوگون (چهارشنبه، ۲۷ عقرب) نشر قیلگن بیاناتیده ایتیشیچه، بو بارهدهگی کېلیشوو طالبانلر مالیه وزیری ملا محمد ناصر و ایران اقتصاد و مالیه وزیری سیدعلی مدنيزاده اۉرتهسیدهگی اوچرهشوو دوامیده اېریشیلگن.
وزیرلیک بیاناتیگه کۉره، تامانلر، شونینگدېک، افغانستان باجخانه تیزیملرینی اۉزارا باغلش، چېگره بندرلرده ترانسپورت واسطهلری قتناوینی کۉپهیتیریش، بندرلرده ناقانوني تۉلاولرگه برهم بېریش، تاورلر ثاچاقینینگ آلدینی آلیش، ترانسپورت واسطهلری نینگ چېگره پورتلریده توختهب قالیشیگه یۉل قۉیمسلیک همده افغانستان صادراتی اوچون ضرور شرایطلرنی یرهتیش مسألهلرینی محاکمه قیلگن و کېلیشوولرگه اېریشگن.
طالبلر مالیه وزیری جاري هفته نینگ شنبه کونی بیر هیئتگه باشچیلیک قیلیب ایرانگه بارگن اېدی.
او ایراننینگ بیر قطار باشقه رسميلری بیلن هم سودا-اقتصادي علاقهلرنی کېنگهیتیریش، باجخانه و ترانزیت فعالیتی یوزهسیدن مذاکرهلر آلیب بارگن.
اوّلراق طالبلر و ایران افغانستان نینگ نیمروز ولایتیدهگی پل ابریشم چېگره اۉتیش بندری همده ایراننینگ سیستان و بلوچستان ولایتیدهگی میلک چېگره بندری اۉرتهسیده ترانزیت و یوک تشووچی ترانسپورت واسطهلری نینگ قتناوی ۲۴ساعتلیک ترتیبگه اۉتکزیلگنینی معلوم قیلگن اېدی.
