پاکستاننینگ افغانستان بۉییچه مخصوص نمایندهسی محمد صادق «میکائیل لیندوال» بیلن اوچرهشیب، مذاکره اۉتکزگنینی معلوم قیلدی. او سویدن تشقی ایشلر وزیرلیگینینگ گلوبل مسألهلر بۉییچه باش مدیری حسابلنهدی.
پاکستاننینگ مخصوص نمایندهسی بوگون (چهارشنبه، ۲۷ عقرب) ایکس اجتماعي ترماغیدهگی صحیفهسیده نشر قیلگن پُستیده منطقوي خوفسیزلیک مسألهلری و افغانستاندهگی جاري وضعیت، خصوصاً، پاکستاننینگ تروریزمگه عاید خواطرلری همده ترورچی گروهلرگه قرشی ثمرهلی چارهلر کۉریش ضرورتی محاکمه قیلینگنینی یازگن.
اونینگ قۉشیمچه قیلیشیچه، منطقهده و اوندن تشقریده برقرار تینچلیک همده خوفسیزلیکنی تأمینلش مقصدیده تروریزمنینگ ینگی تهدیدلریگه قرشی کورهشیشده جماعهوي سعی-حرکتلر نینگ اهمیتی هم تأکیدلنگن.
پاکستان رسميلرینینگ دعوا قیلیشیچه، افغانستانده پاکستان طالبان حرکتی (تیتیپی)، «القاعده»، داعش نینگ خراسان بۉلیمی و «بلوچستان آزادلیک حرکتی» کبی ۲۰ دن آرتیق ترورچی گروه فعالیت یوریتماقده. اولر نینگ اَیریملری طالبان تامانیدن هم قۉللب-قوّتلنهدی.
پاکستان رسميلری تیتیپی و اوشبو گروهگه علاقهدار باشقه جنگریلر افغانستان توپراغیدن فایدهلنیب، پاکستانده هجوملر اویوشتیرهیاتگنینی ایتهدی.
بیراق افغانستاندهگی طالبلر پاکستان رسميلرینینگ بو دعوالرینی رد اېتیب، هېچ قندهی گروهگه افغانستان توپراغیدن باشقه دولتلرگه قرشی فایدهلنیشگه رخصت بېرمسلیگینی تأکیدلهیدی.
افغانستانده ترورچی گروهلر گنینگ موجودلیگی بارهسیدهگی کېلیشماوچیلیکلر بیر ییلدن آرتیق وقتدن بېری طالبان و پاکستان اۉرتهسیدهگی مناسبتلرنی کېسکینلشتیریب، ایکّی تامان اۉرتهسیده حربي تۉقنهشوولرگه سبب بۉلماقده.
اوشبو تۉقنهشوولر و کېلیشماوچیلیکلر آرتیدن ایکّی دولت اۉرتهسیدهگی قوروقلیکدهگی چېگره قریب بیر ییلدن بېری یاپیق قالماقده. نتیجهده سودا-ساتیق و قوروقلیک آرقهلی قتناو تا‘ختهب قالگن.
