سعوديه عربستانینینگ دولت ملی بایلیک صندیغی قرارگاهی جایلشگن ریاضدهگی اېنگ بلند آسماناۉپر بنا بوگون (پنجشنبه، ۲۸ عقرب) راکت هجومیگه اوچرهدی. هجوم حوثيلر تامانیدن عملگه آشیریلگن بۉلیشی ممکنلیگی تخمین قیلینماقده.
رویترز خبر آژانسینینگ خبر بېریشیچه، هجوم عاقبتیده دولت ملی ثروت صندیغی (پیآیاف) بناسی نینگ یېتّی-سکّیز قبتیدهگی دېرَزهلر سینگن.
بو ایکّی هفتهدن کم وقت ایچیده حوثيلرنینگ ریاض مالیه مرکزیدهگی مهم بنالردن بیریگه ضرر یېتکزگن ایکّینچی هجومیدیر.
بوندن اوّل، ۸- نوامبر کونی سعوديه عربستانینینگ دولتگه قرهشلی نفت کمپنیسی آرامکو بناسی هم هجومگه اوچرهگن اېدی.
وضعیتدن خبردار اوچته منبع نینگ ایتیشیچه، بنا حوثيلر تامانیدن اوچیریلگن راکت بیلن نشانگه آلینگن. حاضرچه هجوم عاقبتیده انسانلر هلاک بۉلگنی حقیده معلومات یۉق.
حوثيلرگه قرشی کورهشهیاتگن سعوديه عربستانی باشچیلیگیدهگی ائتلاف حوثيلر تامانیدن ریاض تامان اوچیریلگن راکت تهدیدیگه قرشی چارهلر کۉرگنینی معلوم قیلدی. ائتلاف دستلبکی بهالشلرگه کۉره، راکت قالدیقلری یېرگه توشگنی و مادّي ضرر یېتکزیلگنی حقیده خبر بېردی.
حوثيلر حاضرچه اوشبو هجوم یوزهسیدن هېچ قندهی بیانات بېرمهگن.
حوثيلر یمنده اوروش جولای آییده قَیته باشلنگنیدن بېری سعوديه عربستانی نینگ میدانلری و نفت تاسیساتلریگه هجوملر اویوشتیریب کېلماقده.
یمن حدودیده اېسه اوشبو گروه سعوديه عربستانی تامانیدن قۉللب-قوّتلنهدیگن حکومت نظارتیدهگی حدودلر نینگ کتّه قِسمینی اېگهللب آلگن.
سعوديه عربستانی نینگ یمنگه قرشی هجوملری هم دوام اېتماقده.
حوثيلرگه قرهشلی «سبأ» اخبارات آژانسی پنجشنبه کونی تانگده سعوديه عربستانی اوچاقلری یمن پایتختی ثناگه هوا هجوملری اویوشتیرگنینی خبر قیلدی. بیراق بو حقده باتفصیل معلومات بېرمهدی.
