عراق جَنوبیدهگی القادسیه بیلیم یورتیینگ «قیزلر پیداگوژي فاکولتهسی»دن اېرکک اۉقیتووچیلرنینگ چېتلشتیریلیشی طلبه قیزلر نینگ کېنگ کۉلملی ناراضیلیک نمایشلریگه سبب بۉلدی. نمایشچیلر اوشبو قرارنی افغانستانده طالبان تامانیدن جاري اېتیلگن جنسي اجرهتیش سیاستیگه اۉخشهش سیاست دېب بهالهماقده.
«گاردین» نشرینینگ خبر بېریشیچه، بو قرارگه قرشی ناراضیلیک نمایشلری ایکّی هفتهدن بویان دوام اېتماقده و اولرگه قریب ۴۰۰ کیشی محصل قیز قۉشیلگن.
القادسیه بیلیم یورتی اوشبو قرار «عیاللر و اېرککلرنینگ ارهلشیب یوریشینینگ آلدینی آلیش» اوچون ضرور بۉلگنینی همده محصل قیزلرنینگ عایلهلری التماسیگه بناءً قبول قیلینگنینی بیلدیرگن. بیراق طلبهلر بیلیم یورتگه اۉقیشگه کیریشدن آلدین عایلهلری تعلیم بېرووچی خادملر آرهسیده اېرکک اۉقیتووچیلر هم بارلیگینی بیلگنینی، حاضر هم اولرنینگ ناراضیلیکلرینی قۉللب-قوّتلهیاتگنینی ایتیشگن.
محصللرنینگ ایتیشیچه، بیلیم یورت باشلیغی اولرنینگ ناراضیلیکلرینی مسخره قیلگن و اۉز استاذلری، جملهدن، علمي رهبرلرینینگ کوتیلمهگنده چېتلشتیریلیشی یوزهسیدن بیلدیرگن خواطرلرینی محاکمه قیلیشدن باش تارتگن.
۲۲ یاشلی هدا اسملی محصل کورسداشلری بیلن بیرگه ناراضیلیک نمایشلریگه قۉشیلگنینی، بیراق بیلیم یورت مدیری قۉریقچیلری بیلن اولر نینگ یۉلینی تۉسیب، اولرنی مسخره قیله باشلهگنینی ایتگن.
اونینگ قۉشیمچه قیلیشیچه، بیلیم یورت مدیری قۉریقچیلریگه محصل قیزلرنینگ یوزلرینی صورتگه آلیشنی بویورگن. بو ایش کېلهجکده اولرنی قۉرقیتیش و احتمالي جزالش مقصدیده عملگه آشیریلگن.
هدا طلبهلر نینگ عراق جمعیتیده عیاللر و اېرککلر همان بیرگهلیکده ایشلشینی توشونتیریشگه اورینگنینی ایتگن. اولر شوندهی سوال بیلن مراجعت قیلیشگن: «اخیر اېرککلر و عیاللرنی بیردېک دوالهیدیگن داکترلر یۉقمی؟ اوندهی بۉلسه، نېگه بیزگه اېرکک اۉقیتووچیلرنینگ درس بېریشیگه تۉسقینلیک قیلیهپسیزلر؟»
اونینگ سۉزلریگه کۉره، القادسیه بیلیم یورتی مدیری بونگه جوابن: «حتا باشینگیزنی دېوارگه اورسنگیز هم، مېن اۉشه اۉقیتووچیلرنی قَیتریب کېلمهیمن»، دېب ایتگن.
«گاردین» خبریگه کۉره، محصللرنینگ ایتیشیچه، اولرنینگ اکثریتی عیناً شو اۉقیتووچیلر رهبرلیگیده بیتیروو لایحهلری و علمي تدقیقاتلر اوستیده ایشلهماقده.
اولر، شونینگدېک، مذکور اۉقیتووچیلرنینگ درس بېریش اسلوبیگه اۉرگنیب قالگنینی، استاذلر اېسه اۉز محصللرنینگ کوچلی و ضعیف تامانلرینی یخشی بیلیشینی تأکیدلشگن. شو سببلی تعلیم نینگ اوشبو باسقیچیده اولر نینگ اۉرنیگه باشقه اۉقیتووچیلرنی تعیینلش ینهده قیینلشگن.
محصل قیزلرنینگ قۉشیمچه قیلیشیچه، بیلیم یورت رهبریتی اولرگه اگر بو اۉزگریشلردن ناراضی بۉلیشسه، اۉقیشنی دوام اېتتیریشدن واز کېچیشلری کېرهکلیگینی ایتگن.
عراقلیک حقوقشناس و انسان حقوقلری فعالی اسرا سَلمان مملکتده عیاللرگه نسبتاً جاري اېتیلهیاتگن چېکلاولرنی «اجتماعي فلاکت» دېب تعریفلهگن.
او شوندهی دېگن: «عیاللرنینگ استعدادلرینی باستیریشگه قرهتیلگن اورینیشلر دوام اېتماقده. اۉز تاریخیده کۉپلب تنیقلی متفکرلر و متخصصلرنی یېتیشتیرگن، عیاللر اېسه تورلی ساحهلرده ایلغار اۉرینلرنی اېگهلهگن عراق جمعیتینی طالبلر حکمرانلیگیدهگی کابلگه اۉخشش حالتگه کېلتیریشگه حرکت قیلینماقده».
انسان حقوقلری فعالی اوشبو وضعیت «عراق قانونینی، شونینگدېک، مملکت امضالهگن و قیلگن خلقارا شرطنامه همده کانوانسیونلرگه ضد اېکنینی» تأکیدلهگن.
القادسیه بیلیم عراقنینگ قدیمي عالي تعلیم مؤسسهلریدن بیری بۉلیب، ۱۹۸۷-ییلده القادسیه ولایتی نینگ مرکزی شهریده تشکیل اېتیلگن.
مذکور بیلیم یورت عراق عالي تعلیم و علمي تدقیقاتلر وزیرلیگی تصرفیده فعالیت یوریتهدی. اونده تعلیم عرب و انگلیس تیللریده آلیب باریلهدی.
