خلقارا عفو تشکیلاتی اروپا اتفاقی و اونینگ اعضا دولتلرینینگ افغانستان مهاجرلرینی دېپورت قیلیش بۉییچه رېجهلری «اویت داغی» اېکنینی بیلدیردی.
تشکیلات بوگون (چهارشنبه، ۳-سرطان) بروکسلدهگی اروپا کمیسیونی بناسی آلدیده اۉتکزیلگن نمایشده «افغانستاننی خوفسیز مملکت دېب بۉلمهیدی»، دېب تأکیدلهدی.
خلق ارا عفو تشکیلاتینینگ قۉشیمچه قیلیشیچه: «انسان حقوقلرینینگ آغیر احوالی، تاباره کوچهییب بارهیاتگن انسانپرورلیک بحرانی همده عیاللر و قیزلرنینگ تیزیملی روشده باستیریلیشی افغانستانگه دېپورتنی خوفلی چارهگه ایلنتیرهدی و اروپا اتفاقی نینگ حقوقي مجبوريتلرینی اعتبارسیز قالدیرهدی.»
تشکیلاتگه کۉره، افغانستانگه قَیتریلگن هر بیر شخص حقیقي و حجتلشتیریلگن خوفسیزلیک همده حقوقي خطرلرگه دوچ کېلهدی.
شونینگدېک، تشکیلات طالبان انسان حقوقلرینینگ کېنگ کۉلملی و تیزیملی روشده بوزیلیشی یوزهسیدن جوابگرلیککه تارتیلیشی کېرهکلیگینی تأکیدلهدی.
اَیریم اروپا دولتلری باشپناه سۉراولری رد اېتیلگن افغانستان مهاجرلرینی دېپورت قیلیش جریانینی تېزلشتیریش مقصدیده کېچه بروکسلده اروپا کمیسیونی مېزبانلیگیده طالبان هیئاتی بیلن مذاکره اۉتکزدی.
بو اروپا کمیسیونینینگ تکلیفیگه بناءً طالبان وکیللرینینگ اروپا اتفاقیگه اعضا دولتلردن بیریگه قیلگن ایلک رسمي سفری بۉلیب، کېنگ تنقیدلرگه سبب بۉلدی.
اروپا پارلمانی اَیریم اعضالری طالبلرنینگ بروکسلگه تکلیف قیلینیشینی اوشبو گروهنی «نارمللشتیریش» دېب بهالهدیلر و بو سفر نینگ آلدینی آله آلمهگنلیکلری اوچون افغانستان خلقیدن عذر سۉردیلر.
