محلي منبعلرنینگ معلوم قیلیشیچه، ننگرهار ولایتینینگ گۉشته اولسواللیگیده آته و قیزی کنر دریاسیده چۉکیب، حیاتدن کۉز یومگن. محلي منبعلر «اطلاعات روز» گزیتهسیگه واقعه جمعه کونی (۵ سرطان) گۉشته اولسواللیگینینگ «بیله» منطقهسیده صادر بۉلگنینی بیلدیرگن.
منبعلرگه کۉره، «ولیخان» اسملی بیله قیشلاغی یشاووچیسی۱۰ یاشلی قیزی بیلن کنر دریاسیده چۉمیلهیاتگن پیتده چۉکیب کېتگن. منبعنینگ قۉشیمچه قیلیشیچه، آتهنینگ جسدی تاپیلگن، بیراق قیزنینگ جسدی هنوزگچه تاپیلمهگن.
ننگرهار ولایتیده آقر سوولرده چۉمیلیش افغانستاننینگ باشقه ولایتلریگه قرهگنده کۉپراق قربانلر آلیشده دوام اېتماقده.
ننگرهار اخبارات و مدنیت ادارهسی معلوماتیگه کۉره، فقط سۉنگّی بیر آی ایچیده ولایتنینگ تورلی حدودلریده ۲۰نفر ییگیت چۉمیلیش وقتیده چۉکیب جان بېرگن.
هوا ایسیشی بیلن، زمانهوي سوزیش حوضلری یېتیشمسلیگی سببلی، آدملر سلقینلشیش و دَم آلیش اوچون تېز آقهدیگن دریالر همده سوو انبارلریگه باریشماقده.
متخصصلر بوندهی جایلرنی خوفلی دېب حسابلهیدی. شو بیلن بیرگه، ننگرهار ولایتیدهگی بیر گروه یاشلر دریالرده چۉکیش حالتلرینینگ آلدینی آلیش مقصدیده خبردارلیک کمپاینینی باشلهگن.
«ایسّیق سیزنی اۉلدیرمهیدی، اما دریا اۉلدیرهدی» شعاری آستیده اۉتکزیلهیاتگن اوشبو کمپاین آدملرنی دریالرده چۉمیلمسلیککه چقیرماقده.
