فاریاب ولایتیدهگی محلي منبعلر خواجه ناموسی اولسواللیگیده بیر مسجد امامی اۉز خاتینلریدن بیرینی اۉلدیرگنینی ادعا قیلماقده.
منبعلرگه کۉره، بو شخص مولوی جیلان حقّاني بۉلیب، خواجه ناموسیدهگی «مسجدی» نینگ امامی حسابلنهدی.
بیرمنبعنینگ اطلاعات روزگه ایتیشیچه، جیلان حقّاني تۉرت خاتینگه اېگه بۉلگن. او یقینده تۉرتله خاتینینی بیر کونده طلاق قیلگن و شوندن سۉنگ بېشینچی بار ۱۸ یاشلی قیزگه اویلنگن.
منبعنینگ قۉشیمچه قیلیشیچه، جیلان حقّاني کېینچهلیک اوچینچی خاتینینی هم ینه اوییگه قَیتریب آلیب کېلگن، بیراق آرهدن بیر نېچه کون اۉتیب، اونی قییناققه سالیب اۉلدیرگن.
منبعنینگ ینه معلوم قیلیشیچه، ۳۰ یاشلی عیالنینگ جسدی ایکّی کون اوّل جیلان حقّاني نینگ اوییدن تاپیلگن. امام اېسه خاتینینینگ طبيعي اۉلیم بیلن وفات اېتگنینی ادعا قیلگن.
منبعگه کۉره، طالبلر جیلان حقّانينی بیر مرته حبسگه آلگن، اما او سۉراق وقتیده خاتینی وفات اېتگن پیتده مسجدده بۉلگنینی ایتگن و شوندن سۉنگ ینه آزاد قیلینگن.
منبعلر جیلان حقّانينینگ محلي طالبلر مسووللری بیلن یقین علاقهلری بارلیگینی، شو سببلی محلي اهالی و قاتل نینگ عایله اعضالری بو واقعه یوزهسیدن آچیق گپیریشگه جرعت قیله آلمهیاتگنینی اَیتماقده.
شونینگدېک منبعلرگه کۉره، اوشبو امام آلتینچی بار هم ۱۶ یاشلی قیزگه اویلنیشنی رېجهلشتیرگن اېدی.
