طالبلر مدافعه وزیرلیگی پاکستان نینگ بلوچستان و خیبر پختونخوا حدودلریگه «هوا هجوملری» اویوشتیرگنینی معلوم قیلدی.
بیراق پاکستان اوردوسی بلوچستان آسمانیده اوچیریلگن طالبلرنینگ «تۉرتته سادّه درونی» یۉق قیلینگنینی بیلدیردی.
طالبلر مدافعه وزیرلیگی بیاناتیگه کۉره، گروه کوچلری سهشنبه آقشامی (۹ سرطان) پاکستان نینگ بلوچستان ولایتی پیشین اولسواللیگیدهگی «سرانان» منطقهسیده داعش و «شر و فساد عنصرلری» نینگ قۉشمه مرکزلریگه هوا هجوملری اویوشتیرگن.
وزیرلیک، شونینگدېک، خیبر پختونخوادهگی «قمبرخېل» حدودیده داعش مرکزی همده چیترال نینگ شاه سلیم درهسیگه قرهشلی «گرم چشمه» حدودیده داعش و «شر و فساد عنصرلری» نینگ قۉشمه مرکزیگه موفقیتلی هوا هجوملری عملگه آشیریلگنینی دعوا قیلگن.
طالبلرنینگ تأکیدلشیچه، اوشبو مرکزلردن افغانستانده «بوزغونچیلیک فعالیتلری و هجوملرنی رېجهلشتیریش» اوچون فایدهلنیلگن همده اولر افغانستان تینچ اهالیسیگه قرشی عملگه آشیریلگن بامباردمانلرنی موافقلشتیریش مرکزی صفتیده خدمت قیلگن.
مدافعه وزیرلیگی اوشبو هجوملر نتیجهسیده داعش، «شر و فساد عنصرلری» همده اولر نینگ طرفدارلری آغیر تلفات کۉرگنی و کتّه مادّي ضرر یېتکزیلگنینی دعوا قیلگن.
شو بیلن بیرگه، پاکستان اوردوسی فقط بلوچستانگه اویوشتیریلگن هجومگه اورینیشنی تصدیقلب، خیبر پختونخوادهگی دعوا قیلینگن هجوملر حقیده هېچ نرسه دېمهگن.
پاکستان اوردوسی بیاناتیده ایتیلیشیچه، افغانستان طالبانی سهشنبه آقشامی پاکستان نینگ بلوچستان چېگرهسی بۉیلب «تۉرتته سادّه درون»نی اوچیرگن، بیراق اولرنینگ برچهسی یۉق قیلینگن. پاکستان اوردوسی شوندهی یازگن: «دشمنگه تېگیشلی هوا پلاتفورملری پاکستان نینگ کوچلی هوا مدافعه تیزیمی تامانیدن زودلیک بیلن انیقلندی.
خوفسیزلیک کوچلری یوقاری جنگاور شَیلیکنی نمایش اېتیب، مرکّب قرشی چارهلر یاردمیده کیریب کېلهیاتگن تۉرتته درون نینگ برچهسینی موفقیتلی ضررسیزلنتیردی.»
پاکستان نینگ بیلدیریشیچه، «افغانستان طالبان رژیمی نینگ بوندهی حرکتلری اولرنینگ ظلمی آستیده اذیت چېکهیاتگن خلقنی چلغیتیش مقصدیده عملگه آشیریلماقده.»
پاکستان اوردوسی افغانستان طالبانینی پاکستاننی قۉزغهتیشده دوام اېتسه، اولر «مناسب جواب» آلیشینی و بو اولر اوچون «آغیر عاقبتلرگه» آلیب کېلیشینی آگاهلنتیردی.
بیراق پاکستان اوردوسی طالبلرنینگ قمبرخېل و گرم چشمه حدودلریگه هجوم قیلگنی حقیدهگی دعواسی یوزهسیدن ایضاح بېرمهدی. طالبلرنینگ پاکستان حدودیگه اویوشتیرگن اوشبو هجومی پاکستان شو هفته دُیورند چیزیغی بۉیلب جایلشگن افغانستان نینگ اوچ ولایتیگه هجوم قیلگنیدن سۉنگ صادر بۉلدی.
پاکستان اوردوسی یکشنبه آقشامی ۸ سرطان پکتیا، پکتیکا و کنر ولایتلریگه هجوم قیلیب، پاکستان طالبانی حرکتی (تیتیپی) نینگ ۲۵ نفر اعضاسینی اۉلدیرگنینی دعوا قیلگن.
اما طالبان نینگ ایتیشیچه، اوشبو هجومده اوچته تینچ اهالی اویی نشانگه آلینگن و جمعی۳۶ نفر تینچ فقرا هلاک بۉلگن، ینه۱۶۳نفر تینچ فقرا، جملهدن عیاللر و بالهلر یرهلنگن.
بیرلشگن ملتلر تشکیلاتینینگ افغانستاندهگی یاردم ادارهسی (یوناما)۲۸کیشینینگ هلاک بۉلگنی و۴۹ کیشینینگ یرهلنگنینی تصدیقلهگن. طالبان اوّلراق پاکستاندن «قصاص آلیشی» حقیده آگاهلنتیرگن.
