طالبلر تشقی ایشلر وزیری امیرخان متقي ایران رهبری علی خامنهاينینگ دفن مراسمیده اشتراک اېتیش اوچون تهرانگه بارگن و او یېرده بنگلادش پارلمانی رئیسی حافظالدین احمد بیلن اوچرهشیب، مذاکره اۉتکزگن.
طالبلر تشقی ایشلر وزیرلیگی بوگون (شنبه،۱۳ سرطان) نشر قیلگن بیاناتگه کۉره، اوچرهشووده افغانستان و بنگلادش اۉرتهسیدهگی ایکّی تامانلهمه علاقهلرنی رواجلنتیریش، اینیقسه تجارت همکارلیگینی کېنگهیتیریش مسألهلری محاکمه قیلینگن.
امیرخان متقي افغانستان و بنگلادش اۉرتهسیدهگی تجارت صلاحیت همده امکانیتلرینی کتّه دېب بهالب، اوشبو امکانیتلردن ایکّی مملکت اقتصادي اۉسیشینی تأمینلش یۉلیده فایدهلنیش ضرورلیگینی تأکیدلهگن.
طالبلر تشقی ایشلر وزیرلیگی بیاناتیگه کۉره، بنگلهدش پارلمانی رئیسی مملکتینینگ افغانستان بیلن علاقهلرینی اوزاق تاریخگه اېگه اېکنینی ایتیب، «افغانستان نینگ اقتصادي تیکلنیشینی ایکّی تامانلهمه تجارت علاقهلرینی رواجلنتیریش اوچون یخشی امکانیت» دېب بهالهگن.
طالبان پاکستان بیلن مناسبتلر کېسکینلشیب، اۉز ارا تجارت حجمی قیسقرگنیدن سۉنگ، بنگلادشنی هم مقابل تجارت یۉنهلیشلریدن بیری صفتیده کۉریب چیقیشگه حرکت قیلماقده.
شو مقصدده طالبان هیئتلری بنگلادشگه سفر قیلیب، اوشبو مملکت رسميلری و تدبیرکارلری بیلن تجارت همکارلیگی، جملهدن، افغانستانگه دارو-درمان اېکسپورتی مسألهلری یوزهسیدن مذاکرهلر اۉتکزگن.
