طالبلرنینگ عالي تحصیلات وزیرلیگی «ساخته طلبهلر» و فساد حالتلری انیقلنگنی سببلی۹ ته خصوصي بیلیم یورتینینگ فعالیتی تۉختهتیلگنی یاکه بېکار قیلینگنینی معلوم قیلدی.
وزیرلیک بوگون (یکشنبه،۱۸اسد) اعلان قیلگن بیاناتیده ۷ ته خصوصي بیلیم یورتنی فعالیتی بیر ییل مدتگه تۉختهتیلگنی، ینه 2 ته بیلیم یورتی نینگ جوازی اېسه بوتونلهی بېکار قیلینگنینی بیلدیردی.
بیاناتگه کۉره، اوشبو قرارلر ۱۴۰۵-هجري شمسي ییل بهارگی سمستریده اۉتکزیلگن نظارت و بهالش نتیجهلریگه اساسهن قبول قیلینگن.
بیر ییلگه فعالیتی تۉختهتیلگن عالي تعلیم مؤسسهلری قوییدهگیلر: «برلاس» بیلیم یورتی (جوزجان)، «راه سعادت» و «تورکستان» بیلیم یورتلری (بلخ)، «ازهر» و «برنا» بیلیم یورتلری (بدخشان)، «رشاد» بیلیم یورتی (فاریاب)، «پَیام» بیلیم یورتی (کابل). شونینگدېک، «کهندژ» بیلیم یورتی نینگ (قوندوز) همده «خانهې دانش» بیلیم یورتی نینگ (تخار) فعالیت جوازلری دایمي روشده بېکار قیلینگن.
طالبان عالي تحصیلات وزیرلیگی نینگ بیلدیریشیچه، مذکور خصوصي یونیورسیتیلر طلبهلر اوچون ضرور تعلیم شرایطلرینی یرهتمهگن همده منتظم درسلرده قتنهشمسدن، لابراتوار و شفاخانهلردهگی عملي مشغولاتلرنی بجرمسدن طلبهلرنی بیتیریش آرقهلی اداری فسادگه یۉل قۉیگن.
وزیرلیک اَیریم بیلیم یورتلرده درس جدولی موجود بۉلسه-ده، اودیوتوریهلرده حتا بیرته هم طلبه قتنهشمهگنینی تأکیدلهدی.
بیاناتده فعالیتنی تۉختهتیش و جوازلرنی بېکار قیلیش سببلری صفتیده رهبر و اداری ترکیب نینگ یۉقلیگی، ساخته طلبهلر موجودلیگی، دوامت نظارت قیلینمهگنی، یکوني سمستر امتحانلریگه چېتلشتیریلگن طلبهلرنی کیریتیش، طبیات یۉنهلیشلری اوچون لابراتوار جهازلری نینگ یېتیشمسلیگی، وزیرلیک تصدیقلهگن اۉقوو دستوریگه عمل قیلینمهگنی همده طبیات طلبهلری اوچون شفاخانهلرده عملیات امکانیتلری یرهتیلمهگنی کۉرسهتیلدی.
حاضرده افغانستان نینگ۳۴ ولایتیده۱۲۰ دن آرتیق خصوصي عالي تعلیم مؤسسهسی فعالیت یوریتماقده. اولر نینگ کتّه قِسمینی طبیات یۉنهلیشیدهگی انستیتوتلر تشکیل اېتهدی.
