اطلاعات روز: د کرکټ د نړیوال شل اوریز جام د اتو غوره لوبډلو د پړاو په وروستۍ لوبه کې افغانستان په اتو منډو بنګلدېش ته ماتې ورکړه او په دې سره يې نيمه پايلوبو ته لار ومونده.
د افغانستان او بنګلدېش د کرکټ د ملي لوبډلو تر منځ لوبه نن (سېشنبه، ۵ د چنګاښ) ترسره شوه چې افغانستان د ټاس په ګټلو سره لومړی د توپ وهنې پرېکړه وکړه او د پنځو لوبغاړو په سوځېدو سره يې بنګلدېش ته د ۱۱۶ منډو هدف ورکړ چې وروسته د اورونو په کمښت دا هدف ۱۱۴ ته راښکته شو.
د افغانستان له لوري رحمان الله ګربز تر ټولو ډېري ۴۳ منډې وکړې.
بنګلديشۍ لوبډله د هدف په تعقیب کې په اتلسم اور کې ټوله وسوځېده او د بنګلدېش له لوري د پېل لوبغاړي ليټن داس ۵۴ ناسوځيدلې منډې وکړې.
د افغانستان له لوري په توپ اچونه کې راشد خان او نوين الحق څلور او فضل الحق فاروقي او ګلبدين يو-يو مقابل لوبغاړي وسوځول.
دا لومړی ځل دی چې افغانستان د نړيوالو جام په لوبو کې نيمه پايلوبو ته لار پیدا کوي.
افغانستان تر دې وړاندې د غوره اتو لوبډلو په پړاو کې په لومړي ځل اسټراليا ته ماتې ورکړې وه، خو هند ته يې خپله لوبه بايللې وه.
افغانستان به د روانې جون مياشتې پر ۲۷مه په نيمه پایلوبه کې له جنوبي افريقا سره مخ شي.
