اطلاعات روز: د طالبانو ویاند ذبیح الله مجاهد افغانستان کې د ملګرو ملتونو د ماموریت (یوناما) د غځولو په غبرګون کې ویلي، چې «دغه استازولۍ باید د افغانستان او ملګرو ملتونو او د نورو هیوادونو ترمنځ د اړیکو په پياوړتیا تمرکز وکړي او د تیر په څیر بې ځایه تشویشونو ایجاد نه کړي».
مجاهد نن (سې شنبه، ۲۸ د کب) ایکس کې پر خپله پاڼه په یوې بیانیه کې لیکلي، چې یوناما باید «په افغانستان کې د امنیتي، اقتصادي او اجتماعي پرمختګونو په ملاتړ او په سم انعکاس د افغانستان د خلکو د نړیوالو حقوقو د ترلاسه کولو، د بې ځایه تحریمونو لېرې کولو، د افغانانو شتمنیو د غصب پای ته رسولو او په ملګرو ملتونو کې د افغانستان کرسۍ بیرته افغانانو ته په سپارلو تمرکز وکړي».
د طالبانو ویاند زیاته کړې: «دوی باید د تیر په څیر د بې ځایه تشویشونو ایجادولو، له یو یا دوو جزوي مسایلو څخه په سوء استفاده د افغانستان پر وړاندې پروپاګند ته لاره هواره نکړي او د مغرضو کړیو لپاره د لاس اله نه شي.»
تېره شپه، د ملګرو ملتونو امنیت شورا په افغانستان کې د یوناما ماموریت د یو بل کال لپاره وغځاوه.
په افغانستان کې د ملګرو ملتونو مرستندویه پلاوی (یوناما) د طالبانو له بیا واکمنۍ راهیسې د سیاسي هڅو سربیره د بشري مرستو د څارنې او مدیریت مسوولیت هم په غاړه لري.
په دې موده کې یوناما په وار وار په افغانستان کې د بشري حقونو د وضعیت په اړه اندیښنه څرګنده کړې او د ښځو او نجونو پر وړاندې یې د طالبانو پر تګلارو نیوکې کړي دي.
خو، طالبان د یوناما راپورونه د دوی پر وړاندې د تور انځور خپرول بولي او دغه سازمان د تبلیغاتو په خپرولو تورنوي.
په عین حال کې بیا د طالبانو سره د یوناما پر تعامل هم نیوکې کېږي.
د ملګرو ملتونو ځانګړې استازې رزا اوتنبایوا د افغانستان په اړه د امنیت شورا په وروستۍ غونډه کې ویلي، چې د مهمو نړیوالو اړخونو له لوري ناهیلي مخ پر زیاتېدو ده چې له طالبانو سره سیاسي تعامل ګټه نه لري او شونې ده چې [نه تعامل] په دې ډله کې دننه توندلاري وهڅوي.
نوموړې زیاته کړې، چې طالبانو تر اوسه د افغانستان له نړیوالو تعهداتو سره د یوه انتخاب په توګه چلند کړی دی او ځینې تعهدات یې د دې دلیل له مخې رد کړي چې د هیواد له حاکمیت یا هم دودونو سره په ټکر کې دي.
