د اوکراین ولسمشر ولودیمیر زلنسکي وایي، هغه د امریکا له ولسمشر ډونالډ ټرمپ سره په ټیلیفوني خبرو کې هوکړه کړې چې په نیویارک کې به سره وګوري؛ داسې یوه لیدنه چې ښايي لوی بدلونونه رامنځته کړي.
زلنسکي د یکشنبې په شپه (۲۹ د وږي) په اېکس کې لیکلي چې یو ډول ډیپلوماتیک خوځښت روان دی.
هغه ویلي: «همدا اوس مې له ولسمشر ټرمپ سره خبرې وکړې. دا یوه مهمه خبرې اترې وې او موږ ګڼو موضوعاتو ته ورسېدو. هوکړه مو وکړه چې په نیویارک کې سره ووینو؛ داسې لیدنه چې لوی بدلونونه رامنځته کولی شي.»
زلنسکي ویلي چې «د سولې لاره د اوکراین تر ټولو مهم لومړیتوب دی» او باید سوله ټینګه شي.
د هغه په وینا، د تاوتریخوالي د کمولو او د بنسټیزو امنیتي موضوعاتو د حل لپاره نظرونه شته، چې پکې د انرژۍ امنیت، د خوړو امنیت او د انسانانو د ژوند ساتنه هم شامله ده.
هغه د «امریکایي ټیم سره د همکارۍ» یادونه کړې او ویلي یې دي چې کیف چمتو دی د تاوتریخوالي د کمولو او سولې لپاره ډېر جدي ګامونه پورته کړي.
زلنسکي داسې مهال د سولې او د کړکېچ د کمولو خبرې کوي چې د اوکراین ځواکونو د شنبې په شپه د روسیې پر ضد د خپلو پراخو بېپیلوټه الوتکو له بریدونو څخه یو ترسره کړ. په دغو بریدونو کې له لسو ډوله بریدیزو ډرونونو څخه د مسکو د یوه مهم نفتي تاسیسات او یوه لوژستیکي مرکز د هدف ګرځولو لپاره کار واخیستل شو. همداراز داسې انځورونه خپاره شوي چې ښيي استوګنیزې ودانۍ هم په نښه شوې دي.
ډونالډ ټرمپ د خپل انتخاباتي کمپاین پر مهال څو ځله ویلي وو چې د اوکراین جګړه به د خپلې ولسمشرۍ په لومړیو ۲۴ ساعتونو کې پای ته ورسوي. اوس چې سپینې ماڼۍ ته د هغه له بېرته ستنېدو شاوخوا ۲۰ میاشتې تېرې شوې دي، تر اوسه یې له ولودیمیر زلنسکي سره اووه مخامخ لیدنې، او له ولادیمیر پوتین سره یوه مخامخ لیدنه او ۱۴ ټیلیفوني خبرې کړې دي؛ خو جګړه لا هم روانه ده.
