په کندهار او پکتیا ولايتونو کې د ۶۸ ميليونه افغانيو په لګښت د بېلابېلو ټولګټو پروژو چارې پيل او د ځینو یې بشپړې شوې.
د کندهار ښاروالۍ په یوه خبرپاڼه کې ویلي، چې د کندهار ښار د نهمې او دولسمې ناحیې ترمنځ د برېښناکوټ عمومي سړک د دویم فاز د جوړولو چارې د ۵۲ میلیونه افغانیو په لګښت پیل شوې دي.
په یوه خبرپاڼه کې ویل شوي، د دغه سړک د دویم فاز د جوړولو چارې نن (سه شنبه، ۲۷ د زمري) پیل شوې او ټاکل شوې چې د روان ۱۴۰۵ لمریز کال تر پایه بشپړې شي.
د خبرپاڼې د مالوماتو له مخې، په دې پروژه کې د ترینکوټ له زړې هډې څخه تر ګلدان پورې د ۱.۵ کیلومتره اوږد او ۴۰ متره پراخ سړک جوړول شامل دي.
بلخوا د پکتیا لپاره د طالبانو د پېښو پر وړاندې د مبارزې رئیس مولوي نثار احمد نجات ویلي، په دغه ولایت کې د شاوخوا ۱۶ میلیونه افغانیو په لګښت څلور د والیبال لوبغالي، یو د فوټبال لوبغالی، یو کانال او یو استنادي دېوال جوړ او ګټې اخیستنې ته وسپارل شول.
نوموړي ویلي، دغه پروژې د ملګرو ملتونو پراختیايي پروګرام (UNDP) او د ځوانانو خدماتي موسسې په مالي او تخنیکي همکارۍ د زرمت، سیدکرم او مرکز ګردېز په ولسوالیو کې پلې شوې دي.
نوموړي زیاته کړې چې د ګردېز ښار اړوند د ملکخېل او خوستپل په سیمو کې یو ۵۳۰ متره اوږد کانال او ۳۶۱ متره اوږد استنادي دېوال هم جوړ شوی دی.
د هغه په خبره، د استنادي دېوال د جوړولو چارې د «AOM» نړیوالې مرستندویه ادارې په څه باندې اته میلیونه افغانیو مالي مرسته ترسره شوې دي.
دا پروژې داسې مهال پیل شوي چې له دې مخکې یو شمېر خصوصي ودانیز او لوجستیکي شرکتونه ادعا کړې وه، چې د طالبانو د قراردادونو د اسانتیا برخې مسوولان له دوی پیسې او باج اخلي.
د دغو شرکتونو مسوولانو ویلي و، طالبان د محدودیتونو او خنډ جوړونې له لارې په هره پروژه کې مشخصه ونډه غواړي او که ونډه ورنه کړل شي، نه یوازې غوښتنلیکونه ردوي، بلکې د شرکتونو لپاره نورې ستونزې هم رامنځته کوي.
