د طالبانو د بهرنیو چارو وزیر امیرخان متقي له امریکا غوښتي چې د افغانستان پر کانونو پانګونه وکړي.
متقي له امریکايي ورځپاڼې «فایننشال ټایمز» سره په یوه مرکه کې، چې نن (دوشنبه، د وږي ۹مه) خپره شوې، ویلي چې طالبانو په اقتصادي برخه کې د «پرانیستو دروازو» سیاست غوره کړی دی.
امیرخان متقي د طالبانو او امریکا د اړیکو په اړه د یوې پوښتنې په ځواب کې ویلي: «افغانستان د کانونو، زیربناوو، کرنې او سوداګرۍ په برخو کې د امریکا د پانګونې هرکلی کوي.»
هغه زیاته کړې چې د طالبانو او امریکا اړیکې «باید د تېرو ۲۰ کلونو د جګړې له دریڅې ونه ارزول شي، بلکې د راتلونکو همکاریو پر بنسټ باید وکتل شي.»
خو متقي روښانه کړې نه ده چې ایا طالبانو په مستقیم ډول سپینې ماڼۍ ته د افغانستان پر کانونو د امریکا د پانګونې وړاندیز کړی که نه.
فایننشال ټایمز لیکلي چې د امریکا ولسمشر ډونالډ ټرمپ له طالبانو سره د نږدې اړیکو د جوړولو «لږه لېوالتیا» ښودلې او وړاندیز یې کړی چې د کابل په شمال کې د بګرام هوايي اډه دې بېرته د امریکا تر کنټرول لاندې ورکړل شي؛ خو طالبانو دا وړاندیز څو ځله رد کړی دی.
متقي ویلي چې په افغانستان کې ټولې پوځي او ملکي تاسیسات، د بګرام هوايي اډې په ګډون، د افغانستان ملي شتمنۍ دي. هغه په بدل کې له سپینې ماڼۍ غوښتي چې په کابل کې د امریکا سفارت بېرته پرانیزي.
د امریکا او د افغانستان د پخواني حکومت له خوا ترسره شوو ځمکپوهنیزو څېړنو ښودلې چې د افغانستان د مسو، اوسپنې، نیوبیوم، کوبالټ، سرو زرو او لیتیم په ګډون د معدني سرچینو ارزښت، چې د څو لسیزو جګړو له امله تر ډېره همداسې پاتې شوې دي، شاوخوا یو ټریلیون ډالره اټکل شوی دی.
طالبانو په ۲۰۲۱ کال کې پر افغانستان له بیا واکمنېدو وروسته، د بهرنیو پانګونو پر وړاندې د «پرانیستو دروازو» د سیاست له اعلان سره، د ځینو طبیعي سرچینو د استخراج بهیر پیل کړی دی. د راپورونو له مخې، طالبانو په تېرو پنځو کلونو کې د سرو زرو او کرومایټ د استخراج لپاره له چینايي او ایراني شرکتونو سره د څه باندې اووه میلیارد ډالرو په ارزښت قراردادونه لاسلیک کړي دي.
