د ایران او امریکا ترمنځ پوځي نښته یو ځل بیا پیل شوې ده. نن سهار وختي (دوشنبه، د وږي ۹مه) امریکايي ځواکونو د ایران په سوېل کې پر یوې ټاپو او ایراني ځواکونو په اردن کې د امریکا پر یوې پوځي اډې برید کړی دی.
حسین محبي، د ایران د سپاه پاسداران د عامه اړیکو مسوول، وايي چې امریکايي ځواکونو د ایران په سوېل کې پر لارک ټاپو برید کړی، چې له امله یې یو شمېر پوځي کسان او ملکي وګړي وژل شوي او ټپیان شوي دي.
د امریکا د پوځ مرکزي قوماندانۍ (سنتکام) په ایکس کې په یوه خپره شوې اعلامیه کې ویلي چې د «نږدې او سمدستي ګواښونو» د له منځه وړلو لپاره یې د ایران د سپاه پاسداران هغه کښتۍ په نښه کړې دي چې د سمندري ماینونو د اېښودلو لپاره کارول کېږي.
په دې اعلامیه کې د لارک ټاپو یادونه نه ده شوې، خو «اکسیوس» خبري اژانس د امریکايي امنیتي سرچینو په حواله راپور ورکړی چې سنتکام پر لارک ټاپو کې پر دوو توغندیو ویشتونکو برید کړی دی.
د سپاه پاسداران عامه اړیکو ادارې په یوه اعلامیه کې ویلي چې د لارک ټاپو پر وړاندې د امریکا د برید په غبرګون کې یې په اردن کې د امریکا دوه پوځي اډې په نښه کړې دي.
د سپاه پاسداران په اعلامیه کې راغلي چې په اردن کې یې د «ملک حسین» او «ازرق» پر پوځي اډو د برید پر مهال د امریکا تخنیکي او ترمیماتي تاسیسات او د جنګي الوتکو د ځای پر ځای کېدو سیمې په نښه کړې، چې د دوی په وینا، درانه زیانونه یې اړولي دي.
په همدې حال کې، اردن د خپل هوايي حریم د نقض خبر ورکړی، خو ویلي یې دي چې له ایران څخه توغول شوي اته توغندي یې شنډ او له منځه وړي دي.
د اردن پوځ په یوه اعلامیه کې ویلي چې د دغه هېواد دفاعي سیستمونو نن سهار هغه اته توغندي رهګیري کړي چې د اردن هوايي حریم ته ننوتي وو.
د ایران او امریکا ترمنځ دا تازه نښته په داسې حال کې رامنځته شوې چې په تېرو څو اوونیو کې د دواړو هېوادونو ترمنځ هېڅ متقابل پوځي نښته نه وه شوې. ایران هڅه کوله چې د هرمز تنګی تر خپل کنټرول لاندې راولي، په داسې حال کې چې امریکا پر ایران د سمندري محاصرې د ساتلو او د لا ډېرو اقتصادي بندیزونو پر لګولو تمرکز کاوه.
