امریکا قۉشمه ایالتلری اۉنلب مهاجرلرنی، جملهدن، افغانستاننینگ۱۲ کیشی وطنداشینی مرکزي افریقا جمهوریتیگه دېپورت قیلدی.
«آسوشیتدپرس» اخبارات آژانسی خبریگه کۉره، اوشبو مهاجرلر شنبه کونی (۷-سنبله) مرکزي افریقا جمهوریتینینگ پایتختی بنگی شهریگه آلیب کېلینگن.
«ایلک حقوق بشر» تشکیلاتیدن ساوی آروینینگ ایتیشیچه، دېپورت قیلینگنلر آرهسیده ۱۲افغانستانلیک، سکّیز نفر ایرانلیک همده نپالا و نیکاراگوئهدن بۉلگن ینه بیر نېچه کیشی بار.
خبرگه کۉره،۲۰ یاشلی بیر ییگیت هم مرکزي افریقا جمهوریتیگه دېپورت قیلینگن. اونینگ اکهلری افغانستاندهگی اوّلگی حکومت دوریده امریکا اوردوسی بیلن همکارلیک قیلگن.
اوشبو ییگیت نینگ وکیل مدافعسی آلما دیویدنینگ ایتیشیچه، امریکالیک محکمه طالبلر تامانیدن تعقیب قیلینیشیدن قۉرقیش سببلی اونی افغانستانگه دېپورت قیلیشگه یۉل قۉیمهگن.
«آسوشیتدپرس» کۉرگن محکمه حجتلریگه کۉره، ییگیت نینگ عایلهسی افغانستانده اونینگ اکهلری امریکا قۉشمه ایالتلری اوردوسینی قۉللب-قوّتلش یۉلیده قیلگن فعالیتی سببلی طالبلر تامانیدن تهدید قیلینگن.
آلما دیویدنینگ ایتیشیچه، ییگیتنینگ اکهلریدن بیری امریکاده یشهیدی و افغانستان ملي اوردوسیده خدمت قیلگن.
اونینگ قۉشیمچه قیلیشیچه، ینه بیر اکهسی امریکا تامانیدن حربي اوچووچی صفتیده تیارلنگن و کېینچهلیک طالبان تامانیدن اۉلدیریلگن.
عینِ پیتده، باشپناه ایزلاوچیلر حقوقلرینی حمایه قیلووچی تشکیلاتلر، خصوصاً، افغانستاندن امریکا اوردوسی و امریکا تشکیلاتلری نینگ سابق همکارلرینی تخلیه قیلیش جریانیده اشتراک اېتگن تشکیلاتلر واشنگتننی ۲۰۰۱–۲۰۲۱-ییللرده امریکانینگ افغانستاندهگی ماموریتی سببلی اۉز حیاتینی خوف آستیگه قۉیگن انسانلرنی حمایه قیلیشگه ایشانتیریشگه همان حرکت قیلماقده.
بیراق امریکا جمهور رییسی دونالد ترامپ آق اویگه قَیتگنیدن سۉنگ تخلیه جریانینی تۉختهتدی و حتا افغانستان پاسپورتی اېگهلرینینگ امریکا حدودیگه کیریشینی تۉلیق تعقیقلهدی.
تخمیناً اوچ هفته اوّل کانگرس وکیللری ینگی قانون لایحهسینی تقدیم اېتدی. اگر او تصدیقلنسه، حکومت افغانستانده امریکا اوردوسی و امریکا تشکیلاتلری نینگ سابق همکارلری همده اولرنینگ عایله اعضالرینینگ باشپناه و ویزه آلیش بۉییچه عریضهلرینی کۉریب چیقیش جریانینی قَیته باشلشگه مجبور بۉلهدی.
