ایران یېتکرمهلرینینگ خبر بېریشیچه، مملکتنینگ کیرمان ولایتیده افغانستان وطنداشلریی آلیب کېتهیاتگن موترنینگ اغدریلیشی عاقبتیده ایکّی کیشی هلاک بۉلگن، ینه۱۰کیشی جراحتلنگن.
ایسنا خبریگه کۉره، کیرمان قیزیل یریم آی جمعیتی رهبری رضا فلاح اوشبو حادثه بوگون (دوشنبه،۹-سنبله) ولایتدهگی «جوپار باغین» یۉلینینگ 15-کیلومتریده صادر بۉلگنینی ایتگن.
اونینگ قۉشیمچه قیلیشیچه، حادثه حقیده خبر آلینگچ، قیزیل یریم آی نینگ ایکّی نفر قوتقرووچیلر گروهی زودلیک بیلن واقعه جاییگه یوباریلگن. اولر یېتیب باریب، وضعیتنی بهالهگنیدن سۉنگ «اوشبو ترافیک حادثهسیده۱۰ کیشی جراحتلنگنی و ایکّی کیشی هلاک بۉلگنی» انیقلنگن.
کیرمان قیزیل یریم آی جمعیتی باشلیغی شونینگدېک، «قیزیل یریم آی خادملری ایکّی کیشی نینگ جسدینی چیقریب آلیب، تېگیشلی خادملرگه تاپشیردی، جراحتلنگنلر اېسه شاشیلینچ طبي یاردم خدمتی تامانیدن طبیات مرکزیگه آلیب کېتیلدی»، دېگن.
اوّل هم ایرانده افغانستان وطنداشلرینی آلیب کېتهیاتگن موترلرنینگ اغدریلیشی یاکه ترافیک حادثهسیگه اوچرهشی بیلن باغلیق کۉپلب حالتلر حقیده خبر بېریلگن. اوشبو حادثهلرده اۉنلب آدملر هلاک بۉلگن و جراحتلنگن.
بوندهی حادثهلر اساسن افغانستان وطنداشلرینینگ ایرانگه ناقانوني یۉللر آرقهلی سفر قیلیشی جریانیده صادر بۉلهدی.
افغانستانده کېنگ ترقهلگن قشّاقلیک و ایشسیزلیک، شونینگدېک، ایران ویزهلرینی عادتي ترتیبده بېریش جریانی تۉختهب قالگنی سببلی، افغانستانلیکلر ایشلش مقصدیده ناقانوني یۉللر آرقهلی ایرانگه کیریشگه حرکت قیلماقده. بیراق اَیریم حاللرده بو سفرلر اولر نینگ حیاتیگه قیمتگه توشماقده.
