اۉزبېک تیلی ملي کونینی نشانلش مراسمی بوگون (یک‌شنبه) بلخ ولایتی‌نینگ مرکزی مزارشریف شهریده بیر قنچه یازووچیلر، مدنیت فعاللری، بیلیم یورتی‌نینگ اۉقیتووچیلری، اوزبیکستان قنسولی، اورمیه قنسولی، ولایت اطلاعات فرهنگ ریاستی باشلیغی و یاشلر اشتراکیده اۉتکزیلدی.
مراسم بوگون پېشیندن آلدین بلخ ولایتیده‌گی مدنیت فعاللری و مدني جماعه‌لر تامانیدن تشکیل اېتیلدی. اونده بلخ ولایتی‌نینگ مدنی فعاللری و یاشلریدن تشقری، افغانستان‌نینگ شمالي ولایتلریدن کېلگن بیر قطار یازووچیلر، بیلیم یورتی‌نینگ اۉقیتووچیلری و مدنی فعاللر هم اشتراک اېتدی.
مراسمده سۉزگه چیققنلر اۉزبېک تیلی و ادبیاتی‌نینگ اهمیتی، شونینگدېک، اونینگ مدني و تاریخي میراثنی اسره‌ب-اوه‌یلش و کېلگوسی اولادلرگه یېتکزیشده‌گی اۉرنی حقیده گپیردیلر. اولر اۉزبېک خلقی‌نینگ قدیمي مدنیتی و بایلیکلرینی اسره‌ش همده اۉزبېک تیلینی رواجلنتیریش و سقلب قالیش ضرورلیگینی تأکیدله‌دی.
اشتراکچیلر اۉزبېک تیلینی ترغیب قیلیش و رواجلنتیریش مهم‌لیگینی تأکیدلب، شاعر و یازووچیلرنینگ اثرلرینی نشر اېتیش همده چاپ قیلیش بو تیل نینگ رواجی و کېله‌جک اولادلرگه یېتیب باریشیده مهم رۉل اۉینشینی ایتدی.
مراسم دوامیده بیر گروه شاعرلر اوشبو کونگه بغیشلنگن شعرلرینی اۉقیب بېردی. شونینگدېک، ملي طعاملر و عنعنوي کییم-کېچکلر کۉرگزمه‌سی تدبیر نینگ مهم قِسملریدن بیری بۉلدی.
اۉزبېک تیلی ملي کونی جاري ییلده هم افغانستان‌نینگ بیر قطار ولایتلری، شونینگدېک، اروپا و امریکا قۉشمه ایالتلریده تورلی مدني و ادبي محفللر بیلن نشانلندی.
