افغانستان ژورنالیستلری طالبلرنینگ تضییق و تهدیدلریگه دوچ کېله‌یاتگن بیر پیتده، بیرلشگن ملتلر تشکیلاتی باش کاتبی نینگ مملکت بۉییچه مخصوص نماینده‌ی روباب فاطمه اېرکک و عیال ژورنالیستلرنینگ خوفسیزلیگی و دخلسیزلیگینی تأمینلشگه چقیردی.
او بوگون (دوشنبه، ۱۱عقرب) ژورنالیستلرگه قرشی جنایت صادر اېتگنلرنی جزاسیز قالدیریشگه برهم بېریش خلق‌ارا کونی مناسبتی بیلن نشر قیلگن خبریده ژورنالیستلرنینگ ملاقاتنی کوچه‌یتیریش، تینچلیکنی تأمینلش و یخشی باشقروونی مستحکملشده‌گی فعالیتی مهم اهمیتگه اېگه اېکنینی ایتگن.
روباب فاطمه شونده‌ی دېگن: «اۉز حیاتینی حقیقتنی ایزلشگه بغیشله‌گن اېرکک و عیاللرنینگ خوفسیزلیگی و دخلسیزلیگی افغانستانده و بوتون دنیاده برچه‌میز اوچون اساسي اوستوار وظیفه بۉلیشی کېره‌ک.»
افغانستان ایلگری ژورنالیستلر اوچون دنیاده‌گی اېنگ خوفلی مملکتلردن بیری حسابلنگن. طالبلر حاکمیتگه قَیتگنیدن کېین ژورنالیستلرنینگ اۉلدیریلیشی کمه‌یگن بۉلسه-ده، بو گروه ژورنالیستلرنینگ فعالیتی و ایشیگه نسبتاً قتّيق چېکلاو و سانسور جاري قیلگن.
طالبلر مستقل و تنقیدي ژورنالیستلرنی بو گروهگه قرشی فعالیت یوریتیشده عیبلب، اولرنی حبسگه آله‌دی و قماققه تشله‌یدی. «چېگره بیلمس خبرچیلر» تشکیلاتی طالبلر رهبری ملا هبت‌الله آخوندزاده «مطبوعات اېرکینلیگی‌نینگ دشمنلری» رۉیخطیگه کیریتگن.
طالبلر حاکمیتگه قَیتگنیدن کېین افغانستانده‌گی مستقل عامه‌وي اخبارات واسطه‌لری‌نینگ قریب یرمی یاپیلگن، یوزلب ژورنالیست و مېدیا خادملری اېسه مملکتنی ترک اېتگن.
حاضرده طالبلر حکمرانلیگی آستیده فعالیت یوریته‌یاتگن عامه‌وي اخبارات واسطه‌لری اساسن بو گروه فعالیتینی یاریتیش بیلن چېکلنماقده.
