روسيه تشقی ایشلر وزیرلیگی امریکانینگ ایرانگه قرشی ینگی حربي حرکتلرنی رېجه‌لشتیره‌یاتگنیدن دلالت بېرووچی بېلگیلر خواطرلی اېکنینی بیلدیردی.
«سپوتنیک» خبریگه کۉره، روسيه تشقی ایشلر وزیرلیگی مطبوعات سوزلاوچیسی ماریا زاخاورا بوگون (دوشنبه، ۱۱ عقرب) مطبوعات انجمنیده شونده‌ی دېگن: «سۉنگگی آیلر نینگ اچّیق تجربه‌سی بیزگه شونی کۉرسه‌تدیکی، ایرانده اۉلیم و ویرانه‌گرچیلیکلرگه سبب بۉلگن حربي اونتیوریه‌لر ایرانلیکلرنینگ اۉز مملکتی حاکمیتینی و مستقللیگینی حمایه قیلیش اراده‌سینی سیندیریشگه قادر اېمس.»
او قۉشیمچه قیلگن: «بوگون ینگی هجوملر اویوشتیریش بیلن تهدید قیله‌یاتگنلر بو حقده اۉیلب کۉریشلری کېره‌ک.»
روسيه تشقی ایشلر وزیرلیگی مطبوعات سوزلاوچیسی‌نینگ ایتیشیچه، روسيه ایران و امریکا اۉرته‌سیده‌گی واسطه‌چیلر سعی-حرکتلرینی قۉللب-قوّتله‌یدی همده ایکّی تامان اۉرته‌سیده‌گی مذاکره‌لر جریانیگه یاردم بېرماقده.
ماریا زاخاورا، شونینگدېک، روسيه ایران مسأله‌سیده یېچیملرنی تاپیشده اشتراک اېتیشگه تیار اېکنینی ایتگن.
«آنتلانتیک» نشری دونالد ترامپ، مملکتده بۉلیب اۉته‌دیگن آره‌لیق سیلاولردن سۉنگ ایرانگه قرشی قیسقه مدتلی، بیر نېچه کون دوام اېته‌دیگن حربي هجوملرنی قَیته باشلش وریانتلرینی کۉریب چیقه‌یاتگنینی خبر قیلگن.
بو آره‌ده سۉنگگی کونلرده قطر واسطه‌چیلری‌نینگ ایران و امریکا اۉرته‌سیده کېلیشووگه اېریشیش باره‌سیده‌گی سعی-حرکتلری کوچه‌یگن.
قطرلیک واسطه‌چیلر هفته آخریده اوچ کون کېتمه-کېت واشنگتن بیلن تۉلیق موافقلشتیریلگن حالده تهران و دوحه‌ده ایران رسميلری بیلن مذاکره‌لر اۉتکزگن. بیراق ایران تشقی ایشلر وزیری بو مذاکره‌لر حاضرچه انیق نتیجه بېرمه‌گنینی ایتگن.
ایران امریکا نینگ ینگی هجوملرگه تیارلنه‌یاتگنی حقیده‌گی خبرلرگه مناسبت بیلدیریب، دیپلوماتیک هم، اۉزینی حمایه قیلیشگه هم تیار اېکنینی معلوم قیلگن.
ایران رهبری مجتبی خامنه‌ای هم یقینده مملکت حربي قوماندانلریگه امریکا تامانیدن قَیته هجوم اویوشتیریلگن تقدیرده، زودلیک بیلن و جیوگرافیک چېکلاولرسیز جواب بېریش حقیده کۉرسه‌تمه بېرگن.
