روسیه ییتکرمهلری روسيه و اوکراین اۉرتهسیدهگی امریکا واسطهچیلیگیده بیرلشگن عرب امیرلیکلرینینگ ابوظبی شهریده مذاکرهلر باشلنگنینی خبر قیلدی.
تاس اخبارات آژانسی بیر منبعگه تهیهنیب خبر بېریشیچه، روسيه، امریکا و اوکراین اۉرتهسیدهگی اوچ تامانلهمه مذاکرهلر بوگون (سهشنبه، ۱۹عقرب) ابو ظبیده باشلنگن.
مذکور نشر روسيه و اوکراین هیئتلری چوکینینگ ایکّی تامانیده بیر-بیریگه قرهمه-قرشی اۉتیرگنی، امریکا وکیللری اېسه چوکینینگ تۉریده جایلشگنینی عکس اېتتیرووچی صورتلرنی نشر قیلگن.
بو روسيه و اوکراین اۉرتهسیده سۉنگگی تۉقّیز آیدن آرتیق وقت ایچیده اۉتکزیلهیاتگن بوندهی توردهگی ایلک اوچرهشوودیر.
اوشبو اوچرهشوو امریکا جمهور رئیسی دونالد ترامپ اۉتگن هفته ایکّی دولت اۉرتهسیدهگی تۉرت یریم ییلدن بېری دوام اېتهیاتگن اوروشنی یکونلش بۉییچه کېنگ قمراولی تینچلیک کېلیشوویگه اېریشیش ممکنلیگینی، بو کېلیشوو اروپا نینگ خوفسیزلیک مسألهلرینی هم قهمرهب آلیشی ممکنلیگینی ایتگنیدن سۉنگ رېجهلشتیریلگن.
اوکراین مذاکرهچیلری روسيه بیلن مذاکرهلر باشلنیشیدن آلدین امریکا، اروپا و ناتو وکیللری بیلن اوچرهشگن.
اوّلراق کيیفنینگ باش مذاکرهچیسی روستم عمروف اجتماعي ترماقلرده شوندهی دېب یازگن اېدی:
«بویوک بریتانیا، فرانسه، آلمان، ایتالیا، ناتو اروپا کمیسیونی وکیللری بیلن دستلبکی اوچرهشوو اۉتکزیلهدی. اونده امریکا نینگ مخصوص وکیللری استیو ویتکاف و جرد کوشنر هم اشتراک اېتهدی».
او قۉشیمچه قیلیب: «بیز اۉز موضوعلریمیزنی موافقلشتیرهمیز و مذاکرهلر نینگ کېینگی باسقیچیدن آلدین عملگه آشیرهدیگن قدملریمیزنی کېلیشیب آلهمیز»، دېب یازگن.
