دنیا مملکتلری رهبرلری بوگون (چهارشنبه، ۲۰عقرب) تورکيهده اۉتکزیلهیاتگن بیرلشگن ملتلر تشکیلاتینینگ اقلیم اۉزگریشی بۉییچه ۳۱-کنفراسی (کوپ ۳۱)ده نطق سۉزلهیدی. اوشبو انجمنده افغانستاندن هېچ قندهی نماینده اشتراک اېتمهیپتی.
کنفراس ۹–۲۰-نوامبر کونلری آنتالیا شهریدهگی کوپ ۳۱ مجموعهسیده بۉلیب اۉتماقده. اونده بیرلشگن ملتلر تشکیلاتینینگ اقلیم اۉزگریشی تۉغریسیدهگی دایرهوي کانوانسیونیگه اعضا ۱۹۶ دولت همده اروپا اتفاقی وکیللری ییغیلگن.
انادولو آژانسینینگ خبر بېریشیچه، کوپ ۳۱ دایرهسیدهگی اېنگ مهم تدبیر حسابلنگن دولت رهبرلری ییغینی کنفراسنینگ «کۉک حدود»ایدهگی اېنگ کتّه مجلسلر سالونیده «انادولو» سالونیده اۉتکزیلهدی.
ییغینده دنیانینگ آلتی قطعهسیدهگی ۹۵مملکتدن ۱۰۲ کیشی دولت رهبری اشتراک اېتیشی کوتیلماقده.
تورکيه جمهور رییسی هم آچیلیش نطقیده مملکتینینگ اقلیم اۉزگریشیگه قرشی کورهش بارهسیدهگی قرهشلری و استراتیژيسینی بیان قیلهدی.
افغانستان اقلیم اۉزگریشیدن اېنگ کۉپ ضرر کۉریشی ممکن بۉلگن مملکتلردن بیری بۉلیشیگه قرهمهی، طالبلر حاکمیتنی قَیته اېگهللهگنیدن بویان خلقارا اقلیم انجمنلریده هېچ قندهی نمایندهگه اېگه اېمس.
بیرلشگن ملتلر تشکیلاتی طالبلر حکومتینینگ ایچکی و خلقارا مقیاسده تن آلینمهگنینی سبب قیلیب، بو گروه وکیللرینی مذکور انجمنلرگه تکلیف قیلمهیپتی.
طالبلر هیئتی تورکيهگه بارگن بۉلسه-ده، کنفراس نینگ اساسي ییغیلیشیده اشتراک اېتمهیدی.
طالبلرگه یقین ییتکرمه خبرلریگه کۉره، بیرلشگن ملتلر تشکیلاتینینگ طالبلر هیئتیگه رسمي «تکلیفنامه» یوبارمهگن. شو سببلی گروه وکیللری کوپ ۳۱ کنفراسسیده قتنهشمهیدی.
مذکور ییتکرمه نینگ یازیشیچه، بمت نینگ ۳۱-اقلیم کنفراسیگه مېزبانلیک قیلهیاتگن تورکيه طالبلرنی اوشبو انجمنده مهمان صفتیده اشتراک اېتیشگه تکلیف قیلگن اېدی.
