آق اوی جمهور رییسی دونالد ترامپ کېلهسی هفته چینده روسيه جمهور رییسی ولادیمیر پوتین و چین جمهور رئیسی شیجین پینگ بیلن اوچرهشیشینی معلوم قیلدی. بو اوچ دولت رهبرلری اشتراکیدهگی ایلک اوچ تامانلهمه اوچرهشوو بۉلهدی.
اوچرهشوو پنجشنبه کونی (۲۸ عقرب) شنژ شریده آسیا-تینچ اقیانوسی اقتصادي همکارلیگی تشکیلاتی (APEC) ییغینی دایرهسیده بۉلیب اۉتیشی رېجهلشتیریلگن.
«واشنگتن پست» گزېتهسینینگ خبر بېریشیچه، آق اوی مطبوعات کاتبی اۉرینباسری اولیویا ویلز ژورنالیستلر بیلن صحبتده اوشبو اوچ تامانلهمه اوچرهشوونی تصدیقلهگن.
اولیویا ویلزنینگ ایتیشیچه، ترامپ دنیاده هسته قوراللری نینگ ترقهلیشینی جوده خوفلی دېب حسابلهیدی. هسته قوراللرینی نظارت قیلیش و قیسقرتیریش اوچته هستوي دولت رهبرلری اۉرتهسیدهگی مذاکرهلر نینگ اساسي موضوعلریدن بیری بۉلهدی.
امریکانینگ یوقاری مرتبهلی ملازملریدن بیری هم ترامپ اوشبو اوچرهشووده ایران اوروشینی محاکمه قیلیشنی رېجهلشتیرهیاتگنینی ایتگن. بیراق اوکراین اوروشی اوچ تامانلهمه مذاکرهلر کون ترتیبیگه کیریتیلمهگن. چونکه واشنگتن بو مسأله یوزهسیدن مسکو بیلن علیحده مذاکرهلر آلیب باریش یۉلینی تنلهگن.
اوشبو ملازم امریکا حکومتی اوچرهشوودن معین بیر کېلیشووگه اېریشیلیشینی کوتمهیاتگنینی تأکیدلب، اونی یېتکچیلر درجهسیدهگی مذاکرهلرنینگ «باشلنغیچ نقطهسی» دېب اتهگن.
ترامپ بوندن آلدین پوتین و شیجین پینگ بیلن علیحده-علیحده اوچرهشگن، بیراق حاضرگچه اوشبو اوچ دولت رهبری اشتراکیده رسمي قۉشمه اوچرهشوو اۉتکزیلمهگن.
