«افغانستان اوچون عیاللر» تشکیلاتی افغانستانلیک عیال فعاللرینینگ تۉرتینچی اوچرهشووی جاري آی.نینگ ۲۲–۲۳-کونلری هسپانیا پایتختی مادرید شهریده اۉتکزیلیشینی نشر قیلدی.
مذکور تشکیلات بوگون (سهشنبه، ۲۶ عقرب) نشر قیلگن بیاناتیده اوشبو اوچرهشوو هسپانیا تشقی ایشلر وزیرلیگی همکارلیگیده «حسابدارلیک آرقهلی عدالت و تینچلیککه اېریشیشده افغان عیاللری نینگ یېتکچیلیگی» موضوعسیده اۉتکزیلیشینی معلوم قیلگن.
تشکیلات بیاناتیگه کۉره، اوچرهشوودن کۉزلنگن مقصد «بیردملیک اظهار اېتیش و سیاسي مجبوريتلر بیلدیریشدن عملي حرکتلر همده برقرار یېچیملر سری اۉتیش، شونینگدېک، افغانستان عیاللرینینگ مملکت بوگونی و کېلهجگینی بېلگیلهیدیگن قرارلرنی قبول قیلیش جریانیدهگی مضمونلی اشتراکی و فعالیتینی تأمینلشدن عبارت».
«افغانستان اوچون عیاللر» تشکیلاتی اوشبو اوچرهشوو دایرهسیده افغانستان عیاللری و قیزلرینی خلقارا مقیاسده قۉللب-قوّتلش مقصدیده «بیر میلیون امضا» کمپاینی هم باشلنیشینی همده تۉرت نفر یاش سپورتچی تقدیرلنیشینی بیلدیرگن.
اوچرهشووده هسپانیا تشقی ایشلر وزیری خوزه مانوئل آلبارس بیرلشگن ملتلر تشکیلاتی و باشقه خلقارا تشکیلاتلرنینگ یوقاری مرتبهلی وکیللری، شونینگدېک، افغانستانلیک عیال فعاللر اشتراک اېتیشی کوتیلماقده.
«افغانستان اوچون عیاللر» تشکیلاتینینگ معلوم قیلیشیچه، اوچرهشوو دایرهسیده افغانستان عیاللری و قیزلری آلدیده تورگن اساسي معمالر همده امکانیتلرگه بغیشلنگن تۉرتته یوقاری درجهدهگی دوره صحبتی اۉتکزیلهدی.
تشکیلاتنینگ قۉشیمچه قیلیشیچه، محاکمهلرده تعلیم، اقتصادي امکانیتلرنی کېنگهیتیریش و برقرارلیک، شونینگدېک، خلقارا عدالت و حسابدارلیک مسألهلری اساسي اۉرین توتهدی. بوندن تشقری، عیاللر حقوقلری بارهسیدهگی اسلامي قرهشلر همده افغانستانده تینچلیککه اېریشیش یۉلیده عیاللرنینگ ثمرهلی و مضمونلی یېتکچیلیگی مسألهلری هم محاکمه قیلینهدی.
اوشبو اوچرهشوو سۉنگگی اوچ ییل دوامیده هسپانیاده اۉتکزیب کېلینگن «بیزنینگ آوازیمیزنی اېشیتینگ» ناملی اوچرهشوولر نینگ دوامی حسابلنهدی.
مذکور اوچرهشوولرنی افغانستان پارلمانی نینگ سابق اعغ فوزیه کوفی رهبرلیک قیلهیاتگن «افغانستان اوچون عیاللر» تشکیلاتی موافقلشتیرهدی و باشقرهدی.
