بیرلشگن ملتلر تشکیلاتینینگ افغانستاندهگی یاردم ادارهسی (یوناما) اوشبو مملکت اسلام صنعتی، معمارچیلیگی و هنرمندچیلیگی نینگ رونق تاپیشیگه کتّه حصه قۉشگنینی تأکیدلهماقده.
یوناما بوگون (چهارشنبه، ۲۷ عقرب) «خلق ارا اسلام صنعتی کونی» مناسبتی بیلن بیانات بېریب، شوندهی دېدی: «افغانستانده اوشبو بای و ابدي میراث اصل قالینلر، صنعت اثرلری، عنعنوي زرگرلیک بویوملری همده مزار شریفدهگی روضهیی مبارک، هرات جامع مسجدی و باشقه یوزلب تاریخي آبدهلرده اۉز عکسینی تاپگن».
یوناما معلوماتلریگه کۉره، اوشبو اثرلر افغانستاننینگ اسلام صنعتی، معمارچیلیگی و هنرمندچیلیگی رونقیگه قۉشگن قیمتلی حصهسینی نمایان اېتهدی.
بیرلشگن ملتلر تشکیلاتینینگ افغانستاندهگی یاردم ادارهسی، شونینگدېک، اسلام صنعتی عصرلر دوامیده شکللنگن ایجادکارلیک، دانشمندلیک و مدنیتلر اۉرتهسیدهگی علاقهلرنینگ عکس-صداسی اېکنینی تأکیدلهگن.
بیرلشگن ملتلر تشکیلاتی نینگ تعلیم، فن و مدنیت مسألهلری بۉییچه تشکیلاتی (یونسکو) هم اوشبو سنه مناسبتی بیلن اسلام صنعتی نینگ «انسانیت نینگ عمومي میراثینی اسرهش، مدني خیلمه-خیللیکنی حمایه قیلیش همده خلقلر اۉرتهسیده ملاقات و همجهتلیکنی رواجلنتیریش»دهگی یوکسک اۉرنیگه اورغو بېرگن.
۲۰۱۹-ییلده یونسکو باش کنفراسی نینگ ۴۰ -ییغیلیشیده هر ییلی ۱۸ -نوامبر سنهسینی «خلقارا اسلام صنعتی کونی» دېب اعلان قیلیش تۉغریسیده قرار قبول قیلینگن.
یونسکونینگ معلوم قیلیشیچه، اوشبو کوننی بېلگیلشدن مقصد اسلام صنعتینینگ اۉتمیشدهگی و زمانهوي دوردهگی تورلی کۉرینیشلری حقیده خبردارلیکنی آشیریش، شونینگدېک، اسلام مدنیتینینگ صنعت آرقهلی انسانیت مدنیتیگه قۉشگن حصهسینی اعتراف اېتیشدن عبارت.
