طالبلرنینگ هراتدهگی اطلاعات و فرهنگ ریاستینینگ معلوم قیلیشیچه، اوشبو ولایتده زعفران گُلی نینگ ۱۱- فستیوالی محلي مسووللر، ایران و تورکيه قنسوللیکلری وکیللری همده تجارلر اشتراکیده اۉتکزیلگن.
مذکور ریاست بوگون (چهارشنبه، ۲۷عقرب) اعلان قیلگن بیاناتیده فستیوال افغانستان زعفرانینینگ ایشلب چیقریش حجمینی آشیریش، صفتینی یخشیلش و مارکېتینگ امکانیتلرینی کېنگهیتیریش مقصدیده تشکیل اېتیلگنینی بیلدیرگن.
افغانستان زعفران اویوشمهسی رئیسی محمد ابراهیم عادل نینگ ایتیشیچه، جاري قویاش ییلیده مملکتده ۱۴ هکتار یېرگه زعفران اېکیلگن و ۵۰–۷۰ تُن حاصل ییغیب آلینیشی کوتیلماقده.
اونینگ قۉشیمچه قیلیشیچه، مملکتده زعفران یېتیشتیریش میدانلرینی کېنگهیتیریش، شونینگدېک، اونی زمانوي ستندردلر اساسیده قَیته ایشلش و قداقلش اوچون شرایط یرهتیش بارهسیدهگی ایشلر دوام اېتماقده.
شو بیلن بیرگه، هرات تجارت – صناعت و سرمایه یاتقیزیش اتاقی اجرائیه بۉلیمی باشلیغی محمد یوسف امین نینگ معلوم قیلیشیچه، جاري ییل نینگ دستلبکی یېتّی آییده افغانستاندن ۳۱ تُن زعفران ۴۸ میلیون امریکا دالری قیمتیده تورلی مملکتلرگه صادر قیلینگن.
اونینگ تأکیدلشیچه، قَیته ایشلش و قداقلش ساحهلریگه کۉپراق سرمایه کیریتیش قۉشیمچه قیمتنی آشیریش، محصولات صفتینی یخشیلش و افغانستان زعفرانینینگ جهان بازارلریدهگی اشتراکینی کېنگهیتیریشگه خدمت قیلیشی ممکن.
افغانستان زعفرانی اۉزی نینگ مزهسی و یوقاری صفتی بیلن دنیاگه مشهور. مملکتدهگی زعفران نینگ اساسي قِسمی هرات ولایتیده یېتیشتیریلهدی.
بلجیم ده جایلشگن «خلقارا طعم انستیتوتی» جاري ییلده ۱۱ -ییل کېتمه-کېت هرات زعفرانی «اېنگ یخشی طعم» مکافاتی ساورینداری دېب اعلان قیلدی.
