دایکندی ولایتینینگ سنگ تخت و بندر اولسواللیگیده یشاوچی محلي منبعلرنینگ خبر بېریشیچه، طالبلرنینگ امر به معروف خادملری تۉرت کیشی یاش قیزنی بورقه کيمهگنی سببلی حبسگه آلگن.
منبعلردن بیرینینگ ایتیشیچه، قیزلر بوگون (چهارشنبه، ۲۷ عقرب) ساعت ۱۰:۰۰ لر اطرافیده بندر بازاری منطقهسیدن حبسگه آلینگن. بوگون کېچقورون «اطلاعات» گزېتهسیگه معلومات بېرگن منبع نینگ بیلدیریشیچه، قیزلر همان طالبلرنینگ امربه معروف ادارهسی حبسخانهسیده سقلنماقده.
منبع نینگ سۉزلریگه کۉره، حبسگه آلینگن قیزلر اۉسمیر بۉلیب، اولرنینگ اکثریتی ۱۸ یاشده.
منبعنینگ قۉشیمچه قیلیشیچه، طالبلر قیزلرگه بازارده چادریسیز یوریش ممکن اېمسلیگینی ایتگن.
ینه بیر منبع هم قیزلرنینگ حبسگه آلینگنینی تصدیقلهگن.
طالبلر بوندن اوّل هم کابل و هرات شهرلریده بیر قطار عیاللر و یاش قیزلرنی چاداری کيمهگنی سببلی حبسگه آلگن اېدی.
گروه رسميلری طالبلر طلبلریگه ماس کییم کيمهگن عیاللر و قیزلر حبسگه آلینیب، قماققه تشلنیشی حقیده آگاهلنتیرگن اېدی.
طالبلر عیاللر یوزینی «عورت» دېب حسابلهیدی و گروه تلقینیگه کۉره، عیاللر تشقریده یورگنده یوزلرینی یاپیشلری کېرهک. طالبلر طلب قیلهدیگن اساسي کییم بورقه بۉلیب، او عیال نینگ بوتون یوزی و تنهسینی یاپیب تورهدی.
