خوست ولایتیدهگی قیشلاقلرنی تیکلش و رواجلنتیریش باشقرمهسیدهگی منبع «اطلاعات روزگه» تصدیقلشیچه، تۉرت کون اوّل اولرگه طالبلر رهبریتی کۉرسهتمسیگه بناءً هېچ بیر خادم سمارت فوندن فایدهلنه آلمهسلیگی ایتیلگن. شونینگدېک، خادملرگه اۉز سمارت فونلرینی مخصوص توزیلگن کمیتهگه تاپشیریش طلبی قۉییلگن.
منبع نینگ سۉزلریگه کۉره، اوشبو باشقرمه خادملری سمارت فون بیلن کۉریلگن هر قندهی شخص حربي محکمهگه تاپشیریلیشی و جزالنیشی حقیده آگاهلنتیریلگن.
پکتيا ولایتی تعلیم باشقرمهسی خادملریدن بیری، اسمی سِر قالیشینی سۉرهب، «اطلاعات روزگه» اوشبو ادارهده هم سمارت فونلردن فایدهلنیش تعقیقلنگنینی معلوم قیلگن.
اونینگ ایتیشیچه، آلدین کۉپلب ایشلر سمارت فونلر آرقهلی آسان بجریلر اېدی، بیراق ینگی تعقیق کتّه معمالرنی کېلتیریب چیقرگن.
منبع نینگ بیلدیریشیچه، اَیریم خادملر اۉز تیلفونلرینی تېگیشلی کمیتهگه تاپشیرگن بۉلسه، باشقهلری بازاردن باشقه تیلفونلر ساتیب آلیب، اولرنی کمیتهگه تقدیم اېتگن.
شونینگدېک، بو کۉرسهتمه نهفقط باشقرمه خادملریگه، بلکه برچه مکتب مدیرلریگه، اۉقیتووچیلرگه و اۉقووچیلرگه هم تطبیق اېتیلیشی ایتیلگن.
حاضرگچه سمارت فونلردن فایدهلنیشنی تعقیقلش بیر نېچه ولایتده جاري اېتیلگن. طالبان و رسمیلری حتی خادملر اۉز اویلریده هم سمارت فون سهقلهی آلمهسلیگینی بیلدیرگن.
معلوماتلرگه کۉره، اوشبو تعقیق طالبان رهبری هبت الله آخوندزاده نینگ آغزهکی کۉرستمهسی اساسیده جاري اېتیلگن.
مذکور چېکلاو تنقید و سلبي مناسبتلرگه هم سبب بۉلگن. تنقیدچیلر نینگ فکریچه، چېکلاونینگ اساسي مقصدی طالبان نینگ سۉز اېرکینلیگی و اخباراتگه کیریش اوستیدن نظارتینی ینه-ده کوچهیتیریش دیر.
افغانستان ژورنالیستلر مرکزی طالبان تامانیدن دولت ادارهلریده سمارت فونلردن فایدهلنیشنی تعقیقلشنی «سۉز اېرکینلیگی و اخباراتگه کیریش اوستیدن نظارتنی کوچهیتیریش سیاستی نینگ دوامی» دېب اتهب، اونی کېسکین قارهلهگن.
افغانستان نینگ بیرلشگن ملتلر تشکیلاتدهگی نمایندهلیگی سرپرستی نصیر احمد فایق اېسه شوندهی دېگن:
«دنیا علم-فن، تکنالوژي و یسمه آنگ یاردمیده انسانلر حیاتینی یخشیلب، ترقیات و فراوانلیک اوچون ینگی امکانیتلر یرهتیب بارهیاتگن بیر پیتده، طالبان افغانستان خلقینی اېنگ عادي علاقه واسطهلری و اخباراتگه کیریش امکانیتلریدن محروم قیلماقده.»
