پاکستان ایچکی ایشلر وزیرلیگی ۱۰جولایدن باشلب ناقانوني افغانستان مهاجرلرینی قۉلگه آلیش جریانی باشلنیشی حقیده کۉرسهتمه بېردی. وزیرلیک مملکتده عملدهگی ویزهسیز یشهیاتگن برچه شخصلرنی «زودلیک بیلن حبسگه آلیش»نی بویورگن.
«دان» گزېتهسی خبریگه کۉره، اوشبو کۉرسهتمه تیناوون (یکشنبه، ۷-سرطان) چیقریلگن. اونده ایالت حکومتلری و اسلام آباد باش کمیساریدن بو مسألهگه «اېنگ یوقاری اوستوارلیک» بېریش همده اونینگ تۉلیق و انیق اجراسینی تأمینلش طلب قیلینگن.
پاکستان ایچکی ایشلر وزیرلیگی مسوول ادارهلرگه ۱۱-جولایدن باشلب حجتسیز افغانستان مهاجرلرینینگ قۉلگه آلینیشی بۉییچه هر کونلیک حسابات تقدیم اېتیشنی هم تاپشیرگن. حساباتلرده عملدهگی ویزهسیز انیقلنگن افغانستان فقرالری سانی، اولرگه نسبتاً کۉریلگن چارهلر و اولرنینگ حاضرگی حالتی عکس اېتتیریلیشی کېرهک.
وزیرلیک بیاناتیده ایتیلیشیچه، بو قرار ۱-جون کونی «ناقانوني خارجي فقرالرنی قَیتریش رېجهسی»نی قَیته کۉریب چیقیشگه بغیشلنگن ییغیلیشده قبول قیلینگن.
پاکستان ۲۰۲۳-ییلده «ناقانوني خارجي فقرالرنی قَیتریش رېجهسی»نی عملگه آشیریشنی باشلهگن. شوندن سۉنگ افغانستان مهاجرلری نینگ وقتینچهلیک یشش حجتلری، جملهدن «افغانستان شهروندلیک کاتی» « افغانستان وطنداشی ثبت نام کارتی» کارتلری بېکار قیلینیب، اولرنی حبسگه آلیش و دېپورت قیلیش جریانی باشلنگن.
بیرلشگن ملتلر تشکیلاتی قاچقینلر بۉییچه عالي کمیسارلیگی معلوماتلریگه کۉره، فقط ۲۰۲۵-ییل نینگ اۉزیده پاکستان۱ میلیون۱۵۵ مینگدن آرتیق افغانستان مهاجرینی افغانستانگه دېپورت قیلگن.
پاکستان افغانستاندهگی طالبان بیلن مناسبتلر کېسکینلشگنی و مملکت نینگ چېگره ولایتلریده خوفسیزلیک بیلن باغلیق حادثهلر کۉپهیگنیدن سۉنگ افغانستان مهاجرلرینی چیقریب یوباریش جریانینی باشلهگن اېدی. سۉنگگی هجوملر یانیده اېسه بو جریان ینه-ده کوچهییشی کوتیلماقده.
