پاکستان تشقی ایشلر وزیرلیگی کراچیدهگی سۉنگّی هجوم و اونده افغانستان وطنداشی اشتراک اېتگنی حقیدهگی دعوالر آرتیدن طالبلرنینگ اسلام آباددهگی اېلچیخانهسی سرپرستینی چقیرتیردی.
پاکستان تشقی ایشلر وزیرلیگی سۉزلاوچیسی طاهر اندرابی بوگون (دوشنبه، ۸-سرطان) اعلان قیلگن بیاناتیده وزیرلیک تیناوون طالبلر دیپلوماتیگه کېسکین ناراضیلیک عریضهسینی تاپشیرگنینی، شو بیلن بیرگه پاکستاننینگ اعتراضی کابلدهگی اېلچیسی آرقهلی طالبان تشقی ایشلر وزیرلیگیگه هم یېتکزیلگنینی معلوم قیلدی.
او شوندهی دېدی: «بو چارهلر هجومده افغانستان وطنداشی، جملهدن تیریک قۉلگه آلینگن بیر شخص اشتراک اېتگنی انیقلنگنی مناسبتی بیلن کۉریلدی.
بو حالت ینه بیر بار افغانستان توپراغی و افغانستان یشاوچیلری پاکستان ایچیده ترورچیلیک هجوملرینی اویوشتیریش اوچون فایدهلنیلهیاتگنینی کۉرسهتماقده.
پاکستان اوردوسی تیناوون کراچیدهگی پولیس مرکزیگه اویوشتیریلگن هجوم قتنشچیلریدن بیری افغانستان فقراسی اېکنی و او یرهدار حالده قۉلگه آلینگنینی بیلدیرگن اېدی.
پاکستان نینگ معلوم قیلیشیچه، کراچیدهگی هجومگه جوابن مملکت اوردوسی پکتيا، پکتیکا و کنر ولایتلریدهگی پاکستانلیک قوراللی گروهلر باشپناهلرینی بامباردمان قیلگن.
پاکستان اخبارات و اېشیتتیریشلر وزیرلیگی اوشبو ضربهلرده ۲۵ نفر ترورچی» اۉلدیریلگنینی دعوا قیلماقده.
بیراق طالبان پاکستان بامباردمانلریده تورر جایلر نشانگه آلینگنی و عاقبتده عیاللر همده بالهلرنی اۉز ایچیگه آلگن۳۶ نفر تینچ اهالی هلاک بۉلگنینی اَیتماقده.
طالبلر سۉزلاوچیسی اۉرینباسری حمدالله فطرت نینگ ایتیشیچه، پکتيا ولایتی نینگ سمکنی تومنیدهگی مندوخېل حدودیده بیر اوی ایکّی مرته بامباردمان قیلینگن.
اونینگ سۉزلریگه کۉره، ایکّینچی هجوم بیرینچی ضربهده یرهلنگنلرگه یاردم بېریش اوچون ییغیلگن محلي اهالی پیتیده صادر بۉلگن. فطرتنینگ تأکیدلشیچه، ایکّینچی هجوم عاقبتیده اوشبو منطقهده۲۸ نفر محلي آدم هلاک بۉلگن، ینه۱۵۸ کیشی یرهلنگن.
اونینگ ایتیشیچه، پکتیکا ولایتیده هم بیر تورر جای بامباردمان قیلینیب، نتیجهده شو اویده یشاوچی آلتی کیشی هلاک بۉلگن.
فطرت نینگ سۉزلریگه کۉره، کنردهگی بامباردمانلرده انسان تلفاتی کوزهتیلمهگن، فقط مادّي ضرر یېتکزیلگن.
