طالبلر تشقی ایشلر وزیرلیگی پاکستاننینگ کابلدهگی اېلچیسی عبیدالرحمان نظامانی چقیرتیریب، «افغانستان هوا حدودی بوزیلگنی همده کنر، پکتيا و پکتیکا ولایتلریدهگی تینچ اهالی اویلرینینگ بامباردمان قیلینگنی» یوزهسیدن کېسکین ناراضیلیک بیلدیرگنینی معلوم قیلدی.
وزیرلیک بوگون (دوشنبه، ۸-سرطان) اعلان قیلگن بیاناتیده طالبلر اوشبو هجوملرنی «خلقارا تمایللر، انسانپرورلیک حقوقی و دولتلر حاکمیتینینگ آچیقدن-آچیق بوزیلیشی» دېب بهالهگنی و اولرنی کېسکین قارهلهگنینی بیلدیردی.
طالبلر تشقی ایشلر وزیرلیگینینگ تأکیدلشیچه، پاکستان بیرینچی مرته «ایشانچلی دلیل و حجتلرسیز» چېگرهدن یوزلب کیلومتر اوزاقلیکده صادر بۉلهیاتگن هجوملرنی افغانستان بیلن باغلهیاتگنی یۉق. بیاناتده ایتیلیشیچه، سۉنگّی ییللرده پاکستان «اۉزینینگ سیاسي و خوفسیزلیک ساحهسیدهگی موفقیتسیزلیکلرینی یشیریش اوچون اساسسیز عیبلاولر ایلگری سوریب، معمالرنی افغانستانگه یوکلشگه اورینگن همده اولرنی حربي کوچ ایشلهتیش آرقهلی حل اېتیش بۉییچه موفقیتسیز استراتیژينی بیر نېچه بار تکرارلهگن».
وزیرلیک بیاناتیده ینه شوندهی دېییلهدی: «بوندهی یاندشوو موجود معمالرنی حل قیلمهیدی، عکسینچه، ایکّی دولت اۉرتهسیدهگی ایشانچ محیطیگه، قۉشنیچیلیک مناسبتلریگه همده منطقوي خوفسیزلیک و برقرارلیککه جدّي ضرر یېتکزهدی.»
پاکستان تیناوون تونده افغانستاننینگ شرقیدهگی کنر، پکتيا و پکتیکا ولایتلریدهگی نشانلرگه ینه هوا هجوملری اویوشتیردی. طالبلر معلوماتلریگه کۉره، هجوملر عاقبتیده کمیده۳۶ کیشی، جملهدن عیاللر و بالهلر جان بېرگن ینه۱۶۳ کیشی یرهلنگن.
طالبان اوشبو هجوملرده تینچ اهالی اوی-جایلری نشانگه آلینگنینی دعوا قیلماقده. بیراق پاکستان ضربهلر تحریک طالبان پاکستان (تیتیپی) و «جماعت اولاحرار» گروهلریگه قرشی عملگه آشیریلگنینی بیلدیرگن.
