بیرلشگن ملتلر تشکیلاتینینگ افغانستانگه کمکلشیش ادارهسی (یوناما) نینگ معلوم قیلیشیچه، پاکستاننینگ کېچه تونده پکتيا، پکتیکا و کنر ولایتلریگه اویوشتیرگن هوا هجوملری عاقبتیده کمیده ۲۸نفر تینچ اهالی جان بېرگن ینه ۴۹کیشی یرهلنگن. قربانلر آرهسیده عیاللر و بالهلر هم بار.
یوناما بوگون (دوشنبه، ۸-سرطان) اعلان قیلگن بیاناتیده بو دستلبکی معلوماتلر اېکنینی و قربانلر سانی ینه آرتیشی ممکنلیگینی بیلدیردی.
یونامانینگ معلوماتیگه کۉره، کېچه ساعت تخمیناً ۱۱:۳۰ ده پکتيا ولایتینینگ سمکنی اولسواللیگیده اویوشتیریلگن هوا هجومیده کمیده ۲۲ نفر تینچ اهالی هلاک بۉلگن، ینه ۴۷ کیشی یرهلنگن.
مذکور ادارهنینگ قۉشیمچه قیلیشیچه، دېیرلی شو وقتده پکتیکا ولایتینینگ گيان اولسواللیگیده عملگه آشیریلگن ینه بیر هوا هجومیده آلتی نفر تینچ اهالی هلاک بۉلگن. کنر ولایتینینگ مروره اولسواللیگیده اوچینچی هجومده اېسه ایکّی نفر باله جراحت آلگن.
بیاناتده اَیتیلیشیچه، یوناما مذکور حادثهلرنی اۉرگنیش و فاکتلرنی تېکشیریش ایشلرینی دوام اېتتیرماقده.
تشکیلات تینچ اهالی آرهسیدهگی تلفاتلرنینگ آلدینی آلیش اوچون خلق ارا انسان حقوق دایرهسیده «احتیاطکارلیک تمایلی، حربي و فقرالیک نشانلرینی فرقلش همده متناسبلیک» قاعدهلریگه رعایه اېتیش ضرورلیگینی تأکیدلهگن.
پاکستان طالبلر بیلن کېسکینلیک دوام اېتهیاتگن بیر پیتده کېچه ینه افغانستاننینگ اوشبو اوچ شرقي ولایتیدهگی نشانلرگه ضربه بېردی و هجوملر تحریک طالبان پاکستان (تیتیپی) همده «جماعت اوالاحرار» گروهینینگ موضعلریگه قرهتیلگنینی دعوا قیلدی.
بیراق طالبان هجوملرده تینچ اهالی اوی-جایلری نشانگه آلینگنینی، عاقبتده کمیده ۳۶ کیشی هلاک بۉلگنی و ینه ۱۶۳کیشی یرهلنگنینی بیلدیردی.
