بیر لشگن ملتلر تشکیلاتینینگ افغانستان بۉییچه انسان حقوقلری مخصوص گزارشگلری ریچارد بنت پاکستاننینگ پکتيا، پکتیکا و کنر ولایتلریگه اویوشتیرگن هوا هجوملریده تینچ اهالی، اینیقسه عیاللر و بالهلر جبرلنگنی حقیدهگی خبرلردن چوقور خواطر و افسوسده اېکنینی بیلدیردی.
بنت بوگون (دوشنبه، ۸-سرطان) کېچقورون ایکس اجتماعي ترماغیدهگی صحیفهسیده قربانلرنینگ عایله اعضالریگه همدردلیک اظهار اېتدی.
او شوندهی یازدی: «پاکستاننینگ خوفسیزلیک بیلن باغلیق خواطرلری خلقارا حقوق نارمهلریگه موافق حل اېتیلیشی کېرهک. مېن برچه تامانلرنی وزمینلیککه، تینچ اهالینی حمایه قیلیشگه و جوابگرلیکنی تأمینلشگه چقیرهمن.»
پاکستان کېچه تونده افغانستاننینگ پکتيا، پکتیکا و کنر ولایتلریدهگی نشانلرگه ینه هوا هجوملری اویوشتیریب، ضربهلر تحریک طالبان پاکستان (تیتیپی) و «جماعت اولاحرار» گروهینینگ موضعلریگه قرهتیلگنینی دعوا قیلگن اېدی.
طالبان اېسه هجوملرده تینچ اهالی اوی-جایلری نشانگه آلینگنینی، عاقبتده ۳۶کیشی هلاک بۉلگنی و ینه ۱۶۳ کیشی یرهلنگنینی بیلدیردی.
بیرلشگن ملتلر تشکیلاتینینگ افغانستانگه کمکلشیش ادارهسی (یوناما) اوشبو هجوملرده ۲۸نفر تینچ اهالی هلاک بۉلگنی و ینه ۴۹ نفری جراحتلنگنینی تصدیقلهدی. یوناما معلوماتیگه کۉره، قربانلر آرهسیده عیاللر و بالهلر هم بار.
مذکور هوا هجوملری طالبان و پاکستان اۉرتهسیدهگی کېسکینلیک دوام اېتهیاتگن بیر پیتده صادر بۉلدی.
پاکستان جاري ییل فبروری آییده طالبان بیلن قوراللی تۉقنهشوولر باشلنگنیدن بویان افغانستاننینگ تورلی ولایتلریگه بیر نېچه بار هوا و راکت هجوملری اویوشتیرگن. بو هجوملر عاقبتیده یوزلب تینچ اهالی هلاک بۉلگن یاکه یرهلنگن.
