محلي منبعلرنینگ اطلاعات روز گزېتهسیگه معلوم قیلیشیچه، پکتیکا ولایتینینگ جانی خیل اولسواللیگیده محمد عمر اسملی سابق حربي نامعلوم قوراللی شخصلر تامانیدن اۉلدیریلگن.
منبعنینگ ایتیشیچه، محمد عمر تیناوون (سهشنبه،۹ سرطان) ایکّی کیشی موترسیکلده کېلگن قوراللی شخص تامانیدن آتیب اۉلدیریلگن.
منبعنینگ قۉشیمچه قیلیشیچه، محمد عمر جانی خېل اولسواللیگینینگ بابوخېل قیشلاغی یشاوچیسی بۉلیب، جمهوریت دوریده پولیس صفیده خدمت قیلگن.
او جمهوریت حکومتی قولهگچ و طالبلر ینه حاکمیتنی اېگهلهگچ، اوّل اېرانگه، کېین اېسه پاکستانگه قاچگن اېدی.
او یقینده اوکهسی نینگ تۉییده قتنهشیش اوچون افغانستانگه قَیتگن اېدی.
منبع نینگ سۉزلریگه کۉره، محمد عمر اوکهسی نینگ تۉییدن اتیگی بېش کون اۉتیب اۉلدیریلگن.
بو واقعه پکتیکاده کېتمه-کېت ایکّینچی سابق حربي نینگ اۉلدیریلیشی بۉلدی. بوندن بیر کون اوّل، دوشنبه کونی هم ولایتده ینه بیر سابق حربي هلاک اېتیلگن اېدی.
محلي منبعلر اطلاعات روزگه معلوم قیلیشیچه، جمهوریت حکومتی دوریدهگی چېگره پولیسی خادیمی عمرانالله، حاکمیت المشگنیدن کېین محلي “غرغشت” تلویزیونیده آشپز بۉلیب ایشلهیاتگن پیتده، سِرلی طرزده اۉلدیریلگن.
پکتیکادهگی طالبان رسميلری حاضرچه اوشبو ایکّی سابق حربي نینگ اۉلدیریلیشی یوزهسیدن هېچ قندهی بیانات بېرمهگن.
طالبلر عادتده سابق حربيلرنینگ اۉلدیریلیشی حقیده ایضاح بېرمهیدی و اولرنینگ قاتللیگی اوچون مسوولیتنی هم اۉز ذمّهسیگه آلمهیدی.
بیراق اکثریت حاللرده یشاوچیلر، اینیقسه قربانلرنینگ عایله اعضالری، بو قاتللیکلرده طالباننی عیبلب کېلماقده.
