افغانستان خلق اسلامي وحدت حزبی رهبری محمد محقق همده افغانستان ملي قرشیلیک جبههسی رهبری احمد مسعود ایراننینگ سابق رهبری علی خامنهاینینگ تهرانده اۉتکزیلگن دفن مراسمیده اشتراک اېتدی.
تسنیم اخبارات آژانسی محقق و مسعودنینگ تهراندهگی مصلاده علی خامنهای جسدی اوچون دعا قیلهیاتگن صورتلرینی نشر قیلدی. خامنهاي نینگ دفن مراسمی تیناوون آقشام (۱۱-سرطان، پنجشنبه) باشلنگن بۉلیب، کېلهسی پنجشنبهگچه دوام اېتهدی.
بوگون تهران بیر قطار دولتلر و اۉزی نینگ اتفاقچی گروهلری هیئتلریگه مېزبانلیک قیلماقده.
حاضرگچه تورکمنستان ملي یېتکچیسی، عراق جمهور رییسی و پارلمانی رئیسی، ارمنستان باش وزیری، پاکستان ایچکی ایشلر وزیری، چین خلق کانگرسی رئیسی اۉرینباسری همده «قرشیلیک جبههسی»گه اعضا گروهلر هیئتلری تهرانگه یېتیب کېلگن.
طالبان باش وزیری اۉرینباسری ملا عبدالغنی برادر و تشقی ایشلر وزیری امیرخان متقي هم ایراننینگ سابق رهبری دفن مراسمیده قتنهشیش اوچون تهرانگه بارگن.
علی خامنهاينی دفن اېتیش و مراسمنی باشقریش بۉییچه مخصوص کمیسیون اعلان قیلگن دستورگه کۉره، مراسم تۉرت کون (جمعه-دوشنبه) تهرانده، سهشنبه کونی قمده، چارشنبه کونی عراق نینگ کربلا و نجف شهرلریده همده پنجشنبه کونی مشهدده دوام اېتهدی. علی خامنهاي نینگ وصیتیگه موافق، اونینگ جسدی مشهددهگی امام رضا زیارتگاهیگه دفن اېتیلهدی.
آیتالله علی خامنهاي ۱۴۰۴-هجري شمسي ییلی نینگ۹-حوت کونی، تخمیناً تۉرت آی اوّل امریکا و اسرایل نینگ تهراندهگی «بَیترهبری»گه اویوشتیرگن ایلک هوا هجوملری چاغیده عایله اعضالرینینگ بیر قِسمی، جملهدن کویاوی، نبیرهسی، قیزلریدن بیری و اۉغلی (مجتبی خامنهاي نینگ تورموش اۉرتاغی) بیلن بیرگه اۉلدیریلگن اېدی.
