منبعلرنینگ تصدیقلشیچه، بنگلادشلیک تجربهلی دیپلومات رباب فاطمه بیرلشگن ملتلر تشکیلاتی نینگ افغانستاندهگی یاردم ادارهسی (یوناما) نینگ ینگی باشلیغی اېتیب تعیینلنگن.
او ۲۰۲۲-ییل سپتامبریدن ۲۰۲۵-ییل سپتامبریگچه یوناماگه رهبرلیک قیلگن قیرغیزستانلیک سیاستچی و دیپلومات رزا اوتنبایوانینگ اۉرنینی اېگهلهدی. رزا اوتنبایوا آلدین اېسه کانادالیک دیپلومات دبورا لاینز یوناما باشلیغی بۉلگن.
رزا اوتنبایوانینگ وکالت مدتی یکونلنگچ، یوناما نینگ سیاسي مسألهلر بۉییچه اۉرینباسری جورجت گانیون اوشبو ادارهگه وقتینچه رهبرلیک قیلگن.
رباب فاطمه طالبان حاکمیتگه قَیتگنیدن بویان بیرلشگن ملتلر تشکیلاتی باش کاتبی نینگ افغانستان بۉییچه مخصوص وکیلی و یوناما رهبری اېتیب تعیینلنگن ایکّینچی عیال حسابلنهدی.
بیرلشگن ملتلر تشکیلاتی حاضرچه بنگلادشلیک دیپلومات نینگ یوناما نینگ ینگی رهبری اېتیب تعیینلنگنینی رسماً اعلان قیلمهگن.
رباب فاطمه ۲۰۲۲ییل اگوستیدن بویان بیرلشگن ملتلر تشکیلاتی باش کاتبی نینگ اېنگ کم رواجلنگن مملکتلر، دېنگیزگه چیقیش امکانیگه اېگه بۉلمهگن رواجلنهیاتگن دولتلر همده کیچیک آرال رواجلنهیاتگن دولتلر بۉییچه اۉرینباسری لوازمیده فعالیت یوریتیب کېلماقده.
شونینگدېک، او ۲۰۱۹–۲۰۲۲-ییللرده بنگلادش نینگ بیرلشگن ملتلر تشکیلاتیدهگی دایمي وکیلی بۉلگن، اوندن آلدین اېسه بنگلادش نینگ جاپاندهگی اېلچیسی صفتیده ایشلهگن.
رباب فاطمه یوناما رهبرلیگینی طالبان افغانستانده عیاللرگه نسبتاً چېکلاولرنی ینه-ده کوچهیتیریب، اولرنی مملکتدهگی جماعت حیاتیدن بوتونلهی سیقیب چیقریشگه اورینهیاتگن بیر پیتده قبول قیلماقده.
اونینگ سَلفی رزا اوتنبایوا نینگ فعالیتی کېنگ تنقیدلرگه اوچرهگن بۉلیب، قطار عیاللر حقوقلری و انسان حقوقلری فعاللری اونی طالباننی «آقلش» یاکه «ایجابي کۉرسهتیشگه اورینیش»ده عیبلهگن.
