پاکستانده حجتسیز افغانستان مهاجرلرینی حبسگه آلیش نینگ ینگی باسقیچی باشلنیشی عرفهسیده محلي یېتکرمهلرنینگ خبر بېریشیچه، اوشبو رېجه دایرهسیده خیبېر پختونخوا ایالتیدن۲۰ مینگ افغانستان فقراسی دیپورت قیلینهدی.
«اکسپرس تریبون» نشری نینگ یازیشیچه، خیبر پختونخوا ایالتی حکومتی مهاجرلرنی دېپورت قیلیشنی باشلش اوچون برچه ضرور تیارگرلیکلرنی یکونلهگن. رسمي دېپورت جریانی پولیوگه قرشی اېملش کمپاینی توگهشی بیلن باشلنهدی.
پاکستان ایچکی ایشلر وزیرلیگی کۉرسهتمسیگه موافق، حجتسیز افغانستان مهاجرلرینی حبسگه آلیش و دېپورت قیلیش بوگون (جمعه، ۱۹-سرطان) باشلنیشی بېلگیلنگن.
نشرگه کۉره، خیبر پختونخوا حکومتی قراریگه بناءً، افغانستان مهاجر عایلهلری دستلب پېشاور نینگ شهر و قیشلاق حدودلریدن ناصر باغ ترانزیت مرکزیگه آلیب باریلهدی. رۉیخطدن اۉتکزیش و باشقه اداری جریانلر یکونلنگچ، اولر تورخم چېگره یۉلی آرقهلی افغانستانگه قَیتریلهدی.
حساباتده ایتیلیشیچه، پولیس افغانستان باشپناه ایزلاوچیلری حقیدهگی معلوماتلرنی «افغان کالونی، جاده چارسده، بخشو، چمکنی، پشتخره، رینگ رود، نصیر باغ، بورد بازار، رشید گرهی، چهارراه پنج کته، شیرو جنگی، خزانه و شهرکهای جاده ورسک جایلشگن تورر جایلردن تۉپلهگن.
شونینگدېک، پولیس مېوه بازاری، سبزوات بازاری، شېبه بازاری، خیبر بازاری همده تورلی فابریکه و بازارلرده ایشلهیاتگن یاکه تدبیرکارلیک بیلن شغللنهیاتگن افغانستان فقرالری نینگ علیحده رۉیخطلرینی هم توزگن.
پاکستان حکومتی طالبان بیلن ضدیتلر نینگ کوچهییشی و خیبر پختونخوا ولایتیده خوفسیزلیک بیلن باغلیق وضعیت یامانلشگنی آرتیدن حجتسیز افغان مهاجرلرینی حبسگه آلیش تۉغریسیده قرار چیقرگن.
بیرلشگن ملتلر تشکیلاتی قاچقینلر بۉییچه عالي کمیسارلیگی معلوماتلریگه کۉره، پاکستان فقط ۲۰۲۵-ییل نینگ اۉزیده۱ میلیون۱۵۵ مینگدن آرتیق افغان مهاجرینی افغانستانگه دېپورت قیلگن.
