«افغان ایواک» تشکیلاتی امریکا سنا مجلسی افغانستانلیک اتفاقچیلرنی قۉللب-قوّتلش مقصدیده «افغانستان اوچون مؤقت حمایه تۉغریسیدهگی قانون لایحهسی»نی تقدیم اېتگنینی معلوم قیلدی.
تشکیلات بیاناتیگه کۉره، اوشبو قانون لایحهسی امریکا سنا مجلسینینگ جمهوریتچی و دموکرات اعضالری تامانیدن بیرگهلیکده تقدیم اېتیلگن.
« افغان ایواک» نینگ بیلدیریشیچه، مذکور قانون لایحهسی افغانستاننی 2029-ییل 1-جولایگچه مؤقت حمایه مقامی دستوریگه کیریتهدی همده حاضرده امریکاده یشه یاتگن، طلب و خوفسیزلیک تېکشیروولریدن اۉتگن افغانلرگه دېپورتدن حمایه و ایشلش حقوقینی تیکلهیدی.
افغانستان قاچقینلرینی امریکاگه کۉچیریش بیلن شغللنووچی اوشبو تشکیلات نینگ تأکیدلشیچه، دستور اشتراکچیلرگه دایمي یشش مقامینی آلیش اوچون آلدیندن موجود بۉلگن یۉللر- باشپناه، مخصوص مهاجرت ویزه (اسآیوی) یاکه عایلهوي مهاجرت آرقهلی حجتلرینی رسميلشتیرهیاتگن دورده خوفسیز قالیش امکانینی بېرهدی.
« افغان ایواک» نینگ قۉشیمچه قیلیشیچه، قانون لایحهسی چېکلنگن دایرهده قۉللنیلهدی، بیامېتریک معلوماتلرنی تاپشیریش همده خوفسیزلیک و ملي خوفسیزلیک تېکشیروولریدن اۉتیشنی طلب قیلهدی. تشکیلات بونی افغان اتفاقچیلرینی حمایه قیلیش و اولر نینگ ایشلش حقوقینی سقلب قالیش نینگ اېنگ تېزکار یۉلی دېب بهالهگن.
بیاناتده قید اېتیلیشیچه، اوشبو قانون لایحهسی افغان عایلهلریگه مهاجرت ایشلری کۉریب چیقیلیب یکونلنگونگه قدَر خاطرجمع حیات کېچیریش و «امریکا آرزوسی»نی رۉیابگه چیقریش امکانینی بېرهدی. شونینگدېک، اولر شفاکارگه مراجعت قیلیش، اوی اجارهسی شرطنامهسینی امضالش یاکه فرزندینی مکتبگه آلیب باریشده حبسگه آلینیشی یاکه دېپورت قیلینیشیدن دایمي قۉرقوو آستیده یششیگه حاجت قالمهیدی.
«افغان ایواک» امریکا سنا مجلسی اعضالرینی اوشبو قانون لایحهسینی کېچیکتیرمسدن قبول قیلیشگه چقیردی.
تشکیلاتگه کۉره، کانگرس جاري ییلده قبول قیلیشی ممکن بۉلگن باشقه هېچ بیر قانون امریکا بیلن همکارلیک قیلگن، کېینچهلیک بو مملکتگه کۉچیب کېلگن و حاضرده امریکا مهاجرت و باجخانه خدمتی باسیمی آستیده قالهیاتگن افغانلرنینگ خوفسیزلیگیگه بوندن آرتیق تأثیر کۉرسهته آلمهیدی.
طالبلر افغانستانده حاکمیتنی قَیته اېگهلهگنیدن سۉنگ، اساسن امریکا کوچلری و تشکیلاتلری بیلن همکارلیک قیلگن 120 مینگگه یقین افغان وطنداشی امریکاگه کۉچیریلدی.
بیراق، دونالد ترامپ مأموریتی نینگ قطعي مهاجرت سیاستی طفیلی اولرنینگ کۉپچیلیگی نینگ مهاجرت مساله سی حاضرچه ناانیق بۉلیب قالماقده.
