ایران تشقی ایشلر وزیرلیگی افغانستان نینگ مزار شریف شهریدهگی ایران قنسوللیگیگه اویوشتیریلگن هجوم و ایرانلیک دیپلوماتلر همده ژورنالیست نینگ اۉلدیریلگنیگه بغیشلنگن ییللیک مناسبت بیلن اوشبو حادثه نینگ «نا معلوم جهتلری» انیقلنیشی، هجومنی عملگه آشیرگنلر و اونگه بویروق بېرگنلر نینگ شخصی آچیقلنیشی ضرورلیگینی تاکیدلهدی.
۱۳۷۷-ییل نینگ ۱۷ اسد کونی طالبان مزار شریف، بلخ ولایتی مرکزینی اېگهلهگنیدن سۉنگ، اوشبو گروهگه علاقهدار قوراللی شخصلر ایران قنسوللیگیگه باستیریب کیریب، سکّیز کیشی ایرانلیک دیپلومات و بیر ژورنالیستنی آتیب اۉلدیرگن اېدی.
طالبلر بو هجوم اوچون رسماً جوابگرلیکنی اۉز ذمّهسیگه آلمهگن. بیراق اۉشه پیتده ایران اوشبو گروهنی مسوول دېب اعلان قیلگن. کېینچهلیک طالبلر دیپلوماتلر و ژورنالیست «اۉزباشیمچه کوچلر» تامانیدن اۉلدیریلگنینی ادعا قیلگن اېدی.
ایران تشقی ایشلر وزیرلیگی بوگون (شنبه، ۱۷ اسد) اعلان قیلگن بیاناتیده اوشبو حادثهنی ترورچیلیک هجومی دېب اتهب، شوندهی دېدی: «مزار شریفدهگی ایران قنسوللیگیگه قیلینگن ترورچیلیک هجومی و اونینگ خادملری نینگ شهید اېتیلیشی آغیر جنایت همده دیپلوماتیک-قنسوللیک حقوقلری نینگ قۉپال روشده بوزیلیشی بۉلیب، وقت اۉتیشی بو جنایت نینگ آغیرلیگینی کمهیتیره آلمهیدی.»
وزیرلیک بیاناتیده هجوم نینگ نامعلوم جهتلرینی، جملهدن اونی عملگه آشیرگنلر و بویروق بېرگنلرنی انیقلش همده عدالتنی قرار تاپتیریش ضرورلیگی قید اېتیلیب، بو مسألهنی کوزهتیش اوچون موجود برچه امکانیتلردن فایدهلنیلیشی بیلدیریلگن.
ایران سۉنگگی ییللرده هر ییلی مزار شریفده اۉلدیریلگن دیپلوماتلری خاطرهسیگه بغیشلب بیانات اعلان قیلیب کېلهدی. اما بو ییلگی بیاناتده طالبان نامی تیلگه آلینمهگن.
بوندهی بیاناتلر تهراننینگ عملدهگی طالبلر ماموریتی بیلن یقین علاقهلرنی دوام اېتتیرهیاتگن بیر پیتده اعلان قیلینماقده.
