گاردین گزیته‌سی‌نینگ خبر بېریشیچه، بریتانیا ایچکی ایشلر وزیری شبانه محمود قاچقینلرنی قَیته جایلشتیریش اوچون ینگی قانوني یۉل یره‌تیشگه اینتیلماقده. اوشبو رېجه‌ده افغانستانلیک عیاللر و قیزلر همده فلسطینلیک قاچقینلرگه اوستوارلیک بېریله‌دی.
بو تشبث توخته‌تیلگن دستورنی قَیته آچیشنی انگله‌ته‌دی. او اېنگ ضعیف قاچقینلرگه دایمي یشش حقوقیگه تېزراق اېگه بۉلیش امکانینی بېره‌دی.
افغانستان فقرالرینی قَیته جایلشتیریش دستوری اۉتگن ییلی توخته‌تیلگن اېدی.
گاردین نشری‌نینگ یازیشیچه، بریتانیا ایچکی ایشلر وزیرلیگی اوشبو دستور آرقه‌لی کېله‌دیگنلر‌نینگ قریب چارک قِسمینی افغانستانلیک عیاللر و قیزلر همده فلسطینلیک قاچقینلر تشکیل اېتیشینی کوتماقده. بیراق دستلب قبول قیلینه‌دیگنلر سانی جوده کم بۉله‌دی و هر ییلی اولر اوچون کواته بېلگیلنه‌دی. اوشبو رېجه دایره‌سیده احتمالي قاچقینلر خوفسیزلیک تېکشیروولری و جنایي معلوماتلر بۉییچه تېکشیروودن اۉتکزیله‌دی.
اوشبو دستور آرقه‌لی کېلگنلر دایمي یشش حقوقینی آلیش اوچون انچه آسان یۉلگه اېگه بۉله‌دی. اولرگه «چېکلنمه‌گن مدتلی یشش رخصتی» بېریله‌دی و بو دایمي یشش حقوقینی آلیش اوچون بېش ییللیک یۉلنی تأمینله‌یدی. بو اېسه کیچیک قَییقلرده ناقانوني یۉل بیلن کیرگنلر کبی ترتیبسیز یۉللر آرقه‌لی کېلگنلرنینگ مقامی منتظم روشده قَیته کۉریب چیقیلیشیدن فرق قیله‌دی.
بریتانیا ایچکی ایشلر وزیری، شونینگدېک، جاري ییل باشیده اعلان قیلینگن ینه بیر دستورنی رسماً ایشگه توشیره‌دی. اونگه کۉره، کېله‌سی آیدن باشلب اجتماعي حاميلر قاچقینلرنی بریتانیاگه آلیب کېلیش و اولرگه مملکتده ینگی حیات باشلشده یاردم بېریش اوچون عریضه تاپشیریشی ممکن. قاچقینلر اوچون حاميلیک اساسیده‌گی ایش یۉلی هم بهارده ایشگه توشیریلیشی کوتیلماقده.
ایچکی ایشلر وزیرلیگی منبعلری نینگ ایتیشیچه، دستور دستلب یوزلب کیشینی قبول قیلیشدن باشلنه‌دی و ناقانوني مهاجرلر درجه‌سی په‌سه‌ییشی بیلن قبول قیلینه‌دیگنلر سانی بیر نېچه مینگ کیشیگچه آشیریله‌دی. منبعلر نینگ ایتیشیچه، هر ییلی قبول قیلینه‌دیگنلر سانیگه کواته بېلگیلنه‌دی.
قاچقینلر بیرلشگن ملتلر تشکیلاتی نینگ قاچقینلر بۉییچه عالي کمیسارلیگی (UNHCR) و خلق‌ارا قاچقینلرگه یاردم لایحه‌سی (IRAP) تامانیدن انیقلنه‌دی.
