روسيه تشقی ایشلر وزیری سرگئی لاوروف افغانستان نینگ شِمالیده ترورچی گروهلر موجودلیگینی «سېزیلرلی» دېب بهالب، بو گروهلر افغانستاندن مرکزي آسیا و روسيه‌گه تهدیدلرنی یاییش اوچون ته‌یه‌نچ صفتیده فایده‌لنیشگه اورینه‌یاتگنینی ایتدی.
تاس اخبارات آژانسی خبریگه کۉره، سرگئی لاوروف بو بیاناتلرنی بوگون، جمعه کونی، ۲۴ میزان سنه‌سیده جمعی خوفسیزلیک تشکیلاتی (CSTO)، مستقل دولتلر همدۉستلیگی (CIS) و شانگهای همکارلیک تشکیلاتی (SCO) وکیللری ییغیلیشیده بیلدیرگن.
مذکور ییغیلیش مرکزي آسیا و افغانستان خوفسیزلیگیگه عاید مسأله‌لرنی محاکمه قیلیش مقصدیده مسکوده اۉتکزیلگن.
لاوروف شونده‌ی دېدی: «بیز موجود معلوماتلرگه اساسلنیب، تاجیکستان، تورکمنستان و اۉزبېکستان چېگره‌لری بۉیلب جایلشگن افغانستان حدودلریده ترورچی و اېکسترېمیستیک گروهلر نینگ سېزیلرلی درجه‌ده موجودلیگیگه اعتبار قره‌تماقده‌میز. بو حدودلرده اۉقوو کمپلر و مستحکملنگن بزه‌لر تشکیل اېتیلگن. اوشبو گروهلر اعضالری مرکزي آسیا دولتلریگه کیریشگه، اینیقسه اۉزلرینی باش‌پناه ایزلاوچی و حتا سیاح صفتیده کۉرسه‌تیشگه اورینماقده».
او قۉشیمچه قیلدی: «بیزنینگ استخبارات معلوماتلریگه اساسلنگن بهالریمیزگه کۉره، اساسي تهدید روسيه‌ده تعقیقلنگن خلق‌ارا ترورچی «اسلامي دولت» تشکیلاتی نینگ منطقوي بۉلیمی بۉلگن «خراسان اسلامي دولتی» جنگریلریدن کېلیب چیقماقده. اوشبو گروه کابل حکومتی‌نینگ مملکتده برقرارلیکنی تأمینلش امکانیتلرینی ضعیفلشتیریش مقصدینی آچیقچه‌سیگه کۉزله‌ماقده».
روسيه تشقی ایشلر وزیری دوام اېتدی: «بوندن تشقری، اېکسترېمیستیک گروهلر افغانستاندن ترورچیلیک فعالیتینی مرکزي آسیا و روسيه‌گه یاییش اوچون اۉزیگه خاص ته‌یه‌نچ میدانی صفتیده فایده‌لنیشگه اورینماقده. مېن بونی خلق‌ارا ترورچیلیکدن باشقه قنده‌ی ناملشنی بیلمه‌یمن. او پنج دریاسی‌نینگ نریگی تامانیده جایلشگن بۉلیب، اونینگ ترکیبیده مرکزي آسیا، شمالي کاوکز و اویغور کېلیب چیقیشیگه اېگه، یقین شرق و افریقاده‌گی قوراللی هجوملرده جنگاور تجربه آرتتیرگن جنگریلر موجود».
اونینگ ایتیشیچه، افغانستانده‌گی وضعیت منطقه خوفسیزلیگیگه سلبي تأثیر کۉرسه‌تیشده دوام اېتیشی ممکن. «اینیقسه، مسوولیتسیز خارجي اکتورلر بو جریانلردن اۉزلری‌نینگ قیسقه مدتلی مقصدلریگه اېریشیش اوچون فایده‌لنه‌دیگن بۉلسه. بو مقصدلر، البته، مرکزي آسیا و روسيه منفعتلریگه خدمت قیلمه‌یدی»، — دېدی لاوروف.
لاوروف شونده‌ی دېدی: «بیز وضعیتگه رئالیستیک یانده‌شیشگه حرکت قیلماقده‌میز و شو سببلی امریکا همده ناتوگه اعضا باشقه دولتلر افغانستاننی ییگیرمه ییل دوامیده موفقیتسیز باسیب تورگنیدن کېین قالدیرگن آغیر میراثنی یېنگیب اۉتیش اوچون کۉپ وقت کېره‌کلیگینی توشونه‌میز».
گیاهوند مادّه‌لر سوداسیگه قرشی کوره‌ش
روسيه تشقی ایشلر وزیری مسکو و مرکزي آسیاده‌گی همکارلری افغانستاندن قورال-یراغ و گیاهوند مادّه‌لر قاچاقی بیلن باغلیق تهدیدلرگه قرشی کوره‌شیش اوچون برچه امکانیتلرنی ایشگه ساله‌یاتگنینی ایتدی.
او مرکزي آسیا و افغانستان خوفسیزلیگیگه بغیشلنگن کنفراسده شونده‌ی دېدی: «افغانستاندن مرکزي آسیاگه، اوندن کېین اېسه روسيه‌گه قورال-یراغ و گیاهوند مادّه‌لرنی آلیب اۉتیشگه اورینیشلر همان دوام اېتماقده. روسيه و منطقه‌ده‌گی همکارلری بو معمالرگه کېنگ قمراولی و مناسب جواب بېریشی کېره‌ک. بیز عیناً شو یۉنه‌لیشده حرکت قیلماقده‌میز».
لاوروف قۉشیمچه قیلدی: «وقت اۉتیشی بیلن بو باره‌ده‌گی سعی-حرکتلریمیزنی ینه‌ده کوچه‌یتیریشیمیز کېره‌ک. بیز بو مسأله‌ده مرکزي آسیانینگ برچه دولتلری بیلن همکارلیک قیلماقده‌میز. شو بیلن بیرگه، کابلده‌گی هم‌کسبلریمیزنی هم اوشبو سعی-حرکتلرگه جلب قیلماقده‌میز».
او روسيه طالبلر تامانیدن توزیلگن حکومتنی «قبول قیلینیشی کېره‌ک بۉلگن واقعلیک» دېب بیلیشینی ایتیب، تاباره کۉپراق دولتلر بو قره‌شگه قۉشیله‌یاتگنینی بیلدیردی.
روسيه تشقی ایشلر وزیری توشونتیریشیچه: «سیاسي درجه‌ده بیز سعی-حرکتلریمیزنی کابلده‌گی عملدارلرنی تشقی تاماندن قۉللب-قوّتلشنی کوچه‌یتیریش همده اولر نینگ منطقوي خوفسیزلیک منفعتلریگه خدمت قیله‌دیگن فعالیت یۉنه‌لیشلرینی مستحکملشگه قره‌تگنمیز».
او یکونده روسيه افغانستان مستقل، یگانه و تینچ، اوروش همده گیاهوند مادّه‌لردن خالی دولت بۉلیشی کېره‌ک، دېگن قره‌شنی تۉلیق قۉللب-قوّتلشینی تأکیدله‌دی.
حاضرده روسيه طالبلرنی رسماً تن آلگن یگانه دولت حسابلنه‌دی.
روسيه رسميلری افغانستان‌ده ترورچی گروهلر موجودلیگیدن خواطر بیلدیره‌یاتگنیگه قره‌مه‌ی، طالبلرنینگ بو گروهلرگه قرشی کوره‌شیشگه اورینه‌یاتگنینی اَیتماقده. طالبان اېسه افغانستان‌ده هېچ قنده‌ی گروه موجود اېمسلیگی و مملکت حدودی هېچ بیر دولتگه قرشی تهدید توغدیرمسلیگینی تأکیدله‌ماقده.
عینِ پیتده پاکستان طالبلرنی خارجي گروهلرنی قۉللب-قوّتلشده عیبلب، بونده‌ی گروهلر منطقه‌ده تینچلیک اۉرنه‌تیشگه تۉسقینلیک قیله‌یاتگنینی بیلدیرماقده.
