اروپا پارلمانی ۲۰۲۶-ییلگی «فکر اېرکینلیگی اوچون ساختروف مکافاتی» خلق‌ارا جنایت محکمه‌سیگه و اونینگ منصبدارلریگه بیرگه‌لیکده بېریلیشینی اعلان قیلدی.
اروپا پارلمانی رئیسی روبرتو متسولا بوگون (پنج‌شنبه، ۳۰-میزان) مکافات صاحبلرینی اعلان قیلر اېکن، شونده‌ی دېدی: «اروپا پارلمانی ساخاروف مکافاتینی خلق‌ارا جنایت سودی و اونینگ منصبدارلریگه بېریش آرقه‌لی اوشبو سود نینگ خلق‌ارا حقوق و عدالتنی حمایه قیلیش باره‌سیده‌گی مهم فعالیتینی اعتراف اېته‌دی.»
مکافات جاري ییل نینگ دسامبر آییده فرانسه نینگ استراسبورگ شهریده بۉلیب اۉته‌دیگن اروپا پارلمانی یلپی مجلسی دوامیده صاحبلریگه تاپشیریلیشی کوتیلماقده.
خلق‌ارا جنایت محکمه‌سی خلق‌ارا همجعیت اعتباریده‌گی اېنگ آغیر جنایتلرنی صادر اېتگنلیکده عیبلنه‌یاتگن شخصلر بۉییچه تېرگاو آلیب باره‌دی و ضرور دلیللر همده شرطلر موجود بۉلگن تقدیرده، اولرنی محکمه قیله‌دی. بو جنایتلرگه جینوساید، اوروش جنایتلری، انسانیتگه قرشی جنایتلر جنایتی کیره‌دی.
اروپا پارلمانی اوشبو مکافات خلق‌ارا جنایت محکمه نینگ تېرگاو، جنایي تعقیب، محکمه جریانلری همده حبسگه آلیش تۉغریسیده‌گی اۉردرلرنی چیقریش یاکه تصدیقلش کبی فعالیتلریگه اعتبار قره‌تیشینی بیلدیرگن.
خلق‌ارا جنایت محکمه‌سی رئیسی توموکو آکانه بیاناتیده جاري ییلگی فکر اېرکینلیگی اوچون ساخاروف مکافاتینی محکمه و اونینگ منصبدارلریگه بېرگنی اوچون اروپا پارلمانیگه منّتدارلیک بیلدیرگن.
اونینگ ایتیشیچه: «اوشبو مکافات محکمه‌نینگ جزاسیزلیککه قرشی کوره‌شیش و عدالتلی محکمه جریانلرینی تأمینلش باره‌سیده‌گی سعی-حرکتلرینی اعتراف اېتیش بیلن بیرگه، خلق‌ارا عدالت‌نینگ برقرار تینچلیک نینگ اساسي اوستونلریدن بیری صفتیده‌گی مهم رۉلینی هم تن آلیشدیر.»
مکافات خلق‌ارا جنایت محکمه‌سی فعالیتی سببلی کوچلی باسیملرگه دوچ کېله‌یاتگن بیر پیتده اوشبو محکمه و اونینگ منصبدارلریگه تاپشیریلماقده.
امریکا بوندن قریب ۱۵ کون اوّل اسرایل و امریکا کوچلری‌نینگ اوروش جنایتلری بۉییچه آلیب باره‌یاتگن تېرگاولری سببلی اوشبو محکمه‌گه نسبتاً چېکلاولر جاري قیلگن اېدی.
امریکا بوندن آلدین هم اسرایل نینگ باش وزیری بینیامین ناتنیاهو و سابق مدافعه وزیری یوآو گالانت حبسگه آلیش تۉغریسیده اۉردر چیقرگنی سببلی خلق‌ارا جنایت سودی نینگ ۱۳ نفر محکمه‌سی و دادستانینی چېکلاوگه اوچره‌تگن اېدی.
خلق‌ارا جنایت محکمه‌سی، شونینگدېک، افغانستانده‌گی وضعیت بۉییچه هم تېرگاو آلیب بارماقده. محکمه حاضرگچه طالبلرنینگ تۉرت نفر یوقاری مرتبه‌لی عملداری — گروه رهبری هبت‌الله آخوندزاده، عالي محکمه رئیسی عبدالحکیم حقّاني، عالي تحصیلات وزیری ندا محمد ندیم و معارف وزیری حبیب‌الله آغا گه نسبتاً حبسگه آلیش اۉردرلرینی چیقرگن.
